ଭଦ୍ରକ: ଓଠ କଥା କହିପାରେନି । ହେଲେ ଦୁହେଁ ଦୁହିଁଙ୍କୁ ବୁଝିଛନ୍ତି । ଠାର ଠାରରେ ହୃଦୟ ବୁଝୁଛି ହୃଦୟର ପରିଭାଷା । ସାତ ଜନ୍ମର ସାଥି ହୋଇ ଏବେ ଚର୍ଚ୍ଚାକୁ ଆସିଛନ୍ତି ଏହି ଦିବ୍ୟାଙ୍ଗ ଦମ୍ପତି । ଜନ୍ମରୁ କଥା ସିନା କହିପାରୁନାହାନ୍ତି କିନ୍ତୁ ବିବାହରେ ସେସବୁ ବାଧା ସୃଷ୍ଟି କରନି । ଏମିତି ଏକ ନିଆରା ବିବାହ ଦେଖିବାକୁ ମିଳିଛି ଭଦ୍ରକ ସହର ନିକଟସ୍ଥ ପୂଜାରୀ ସାହି ଦଧିବାବନ ମନ୍ଦିର ପରିସରରେ । ଯାହା ଏବେ ସମଗ୍ର ଅଞ୍ଚଳରେ ବିଷୟ ପାଲଟିଛି । ଦୁହେଁ କିଛି କହିପାରନ୍ତି ନାହିଁ । ହେଲେ ପରସ୍ପରର ମନର ଭାଷାକୁ ବୁଝି ସାତ ଜନ୍ମର ସାଥୀ ହୋଇଛନ୍ତି ।
ସୂଚନା ଅନୁଯାୟୀ, ଯାଜପୁର ଜିଲ୍ଲା ବରହଟା ଗ୍ରାମର ହରିହର ପତିଙ୍କ ପୁଅ ହେଉଛନ୍ତି ମନୋଜ ପତି। ସେ ଜନ୍ମରୁ କଥା କହିପାରନ୍ତି ନାହିଁ। ମନୋଜ ଯାଜପୁରର ଏକ ବେକରୀ ଫ୍ୟାକ୍ଟ୍ରିରେ କାମ କରି ପରିବାର ପ୍ରତି ପୋଷଣ କରନ୍ତି । ଅନ୍ୟପଟେ ଭଦ୍ରକ ଟାଉନ ଥାନା ନିକଟ ପୂଜାରୀ ସାହି ଗ୍ରାମର ହୋମଗାର୍ଡ ଭାବେ କାର୍ଯ୍ୟରତ ବିଶ୍ୱନାଥ ଦାସଙ୍କ ଝିଅ ହେଉଛନ୍ତି ନନ୍ଦିତା ଦାସ । ସେ ମଧ୍ୟ ଜନ୍ମରୁ କଥା କହି ପାରନ୍ତି ନାହିଁ । ନନ୍ଦିତାଙ୍କ ବାପା ବିଶ୍ବନାଥ ଦାସ କହିଛନ୍ତି, "ଉଭୟଙ୍କ ବିବାହ ପ୍ରସ୍ତାବ ଆଣିଥିଲେ ଜଣେ ସମ୍ପର୍କୀୟ । ଯାହା ପରେ ପରିବାରର ସହମତିକ୍ରମେ ଉଭୟଙ୍କ ବିବାହ ସ୍ଥିର ହୋଇଥିଲା।"