ଭଦ୍ରକ: ଫୋନି ବାତ୍ୟାରେ ଭଦ୍ରକ ଜିଲ୍ଲାର ଚାନ୍ଦବାଲି ବ୍ଲକ ମଧ୍ୟ କେତେକାଂଶ ପ୍ରଭାବିତ ହୋଇଥିଲା । ହେଲେ ଏହି ଚାନ୍ଦବାଲି ବ୍ଲକକୁ ବାତ୍ୟା ପ୍ରଭାବିତ ଅଞ୍ଚଳ ବୋଲି ଘୋଷଣା କଲେନାହିଁ ପ୍ରଶାସନ ତଥା ସରକାର । ଅନ୍ୟପକ୍ଷରେ ମାତ୍ର ଦୁଇ କିଲୋମିଟର ଦୂରରେ ଥିବା ରାଜକନିକା ବ୍ଲକକୁ ବାତ୍ୟା ଅଞ୍ଚଳ ବୋଲି ଘୋଷଣା କରାଯାଇଛି । ତେବେ ଏହାର ପ୍ରତିବାଦ କରିଛନ୍ତି ଚାନ୍ଦବାଲି ସଂଗ୍ରାମୀ ସେନା ।
ଏହାର ପ୍ରତିବାଦରେ ଚାନ୍ଦବାଲି ସଂଗ୍ରାମୀ ସେନା ପକ୍ଷରୁ ମଙ୍ଗଳବାର ଏକ ଶୋଭାଯାତ୍ରା କରାଯାଇଥିଲା । ଚାନ୍ଦବାଲି ବଜାରରୁ ବାହାରି ତହସିଲ କାର୍ଯ୍ଯାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଥିଲେ ସଂଗ୍ରାମୀ ସେନା । ଏଥିସହ ଫୋନି ବାତ୍ୟାରେ କ୍ଷତିଗ୍ରସ୍ତ ହୋଇଥିବା ଚାନ୍ଦବାଲି ବ୍ଲକକୁ ବାତ୍ୟା ଅଞ୍ଚଳ ବୋଲି ଘୋଷଣା କରିବା ସହ କ୍ଷୟକ୍ଷତିର ସଠିକ ଆକଳନ କରି, କ୍ଷତିଗ୍ରସ୍ତଙ୍କୁ ତୁରନ୍ତ ରିଲିଫ ଦେବା ପାଇଁ ତହସିଲଦାରଙ୍କ ଜରିଆରେ ଏକ ଦାବିପତ୍ର ରାଜ୍ୟପାଳଙ୍କ ଉଦ୍ଦେଶ୍ଯରେ ପ୍ରଦାନ କରାଯାଇଛି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ