ଭଦ୍ରକ: ମୁଣ୍ଡ ଝାଳ ତୁଣ୍ଡରେ ମାରି ଜମିରେ ଧାନ ଫଳାଇଲେ ଚାଷୀ । କିଛି ଧାନ ଖାଇବାକୁ ରଖି ଅବଶିଷ୍ଟ ପରିବାର ପ୍ରତିପୋଷଣ ପାଇଁ ମଣ୍ଡିରେ ବିକ୍ରି କରିଦେଲେ । ହେଲେ ବିକ୍ରି ହୋଇଥିବା ଧାନର ଏପର୍ଯ୍ୟନ୍ତ ମିଳିଲାନି ମୂଲ୍ୟ । ଫଳରେ ଚାଷୀ ହତାଶ । ଏପରି ଦେଖିବାକୁ ମିଳିଛି ଭଦ୍ରକ ଜିଲ୍ଲାରେ । ଜିଲ୍ଲାର 3655 ଜଣ ଚାଷୀ ଏପର୍ଯ୍ୟନ୍ତ ଧାନ ବିକ୍ରିର ପଇସା ପାଇ ନାହାଁନ୍ତି ।
ଜିଲ୍ଲାର 106ଟି ସରକାରୀ ମଣ୍ଡି ମଧ୍ୟରୁ 90ଟି ମଣ୍ଡିରେ ଏପରି ସ୍ଥିତି ରହିଥିବା ଜଣାପଡିଛି । ଚାଷୀମାନେ ମଣ୍ଡିରେ ଧାନ ବିକ୍ରି କରିଥିବା ପ୍ରମାଣ ପତ୍ର ପାଖରେ ରଖିଛନ୍ତି । ସରକାରଙ୍କ ନିୟମ ଅନୁସାରେ ମଣ୍ଡିରେ ଧାନ ଦେବାପରେ 7 ଦିନ ଭିତରେ ବ୍ୟାଙ୍କ ଖାତାକୁ ଟଙ୍କା ଆସିଯିବା କଥା । କିନ୍ତୁ ମଣ୍ଡିରେ ଧାନ ଦେବାକୁ ଇତି ମଧ୍ୟରେ 7 ମାସ ସମୟ ବିତି ଯାଇଥିଲେ ମଧ୍ୟ ଟଙ୍କାର ଦେଖାନାହିଁ ।