ମଦୁଆ ସ୍ବାମୀର ଆକ୍ରମଣରେ ସ୍ତ୍ରୀ ଆହତ

ନିଶାସକ୍ତ ଅବସ୍ଥାରେ ନିଜ ପତ୍ନୀର ପେଟରେ ଭୁଷିଲା ମଦ ବୋତଲ । ସ୍ଥାନୀୟ ଲୋକ ତାଙ୍କୁ ଉଦ୍ଧାର କରି ଜିଲ୍ଲା ମୁଖ୍ୟ ଚିକିତ୍ସାଳୟରେ କଲେ ଭର୍ତ୍ତି । ତେବେ କାଣ୍ଡ ଭିଆଇ ଥିବା ମଦୁଆ ସ୍ବାମୀ ଫେରାର ।

ଭଦ୍ରକ: ମଦୁଆ ସ୍ବାମୀର ଉନ୍ମତ କାଣ୍ଡ। ନିଶାସକ୍ତ ଅବସ୍ଥାରେ ନିଜ ପତ୍ନୀର ପେଟରେ ଭୁଷିଲା ମଦ ବୋତଲ। ଗୁରୁତର ଅବସ୍ଥାରେ ଭଦ୍ରକ ଡାକ୍ତରଖାନାରେ ଭର୍ତ୍ତିହେଲେ ପତ୍ନୀ।

ଖବର ମୁତାବକ କେନ୍ଦୁଝର ଜିଲ୍ଲାର ତଳାଙ୍ଗ ଥାନା ଅନ୍ତର୍ଗତ କନ୍ୟାସାହି ଗାଁର ଗଣେଶ ପ୍ରାୟ ପ୍ରତ୍ୟେକ ଦିନ ମଦ ପିଇକି ଘରକୁ ଆସିଥାଏ। ନିଶାସକ୍ତ ଅବସ୍ଥାରେ ସେ ନିଜ ସ୍ତ୍ରୀ ସହ ଝଗଡା କରି ମାରପିଟ୍ କରିଥାଏ। ଗତକାଲି ବିଳମ୍ବିତ ରାତ୍ରୀରେ ହୋଇଥିବା ଝଗଡା ଉଗ୍ର ରୂପ ଧାରଣା କରିଥିଲା। ନିଶାସକ୍ତ ଗଣେଶ ମଦ ବୋତଲ ଭାଙ୍ଗି ସ୍ତ୍ରୀ ପେଟରେ ଭୁଷି ଦେଇଥିଲା।

ଫଳରେ ତାଙ୍କ ପତ୍ନୀ ଏ ଘଟଣା ପରେ ଅଚେତ ହୋଇଯାଇଥିଲେ। ସ୍ଥାନୀୟ ଲୋକ ତାଙ୍କୁ ଉଦ୍ଧାର କରି ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ। ଏଥିସହ ସ୍ଥାନୀୟ ଥାନାରେ ମଦୁଆ ସ୍ବାମୀ ନାଁରେ ଏତଲା ଦିଆଯାଇଛି। ଏହି କାଣ୍ଡ ଭିଆଇ ମଦୁଆ ସ୍ବାମୀ ଫେରାର ହୋଇଯାଇଛି।

ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ