ଭଦ୍ରକ:ପୌରପାଳିକାରେ ଅଚଳାବସ୍ଥା । ପୌରାଧ୍ୟକ୍ଷା ଏବଂ ପୌର ଉପାଧ୍ୟକ୍ଷାଙ୍କ ମଧ୍ୟ୍ୟରେ ବିବାଦ । ଉପାଧ୍ୟକ୍ଷାଙ୍କ ନୂତନ ଗୃହରେ ସାଜସଜ୍ଜାକୁ ନେଇ ରାଗି ଗଲେ ପୌର ଅଧ୍ୟକ୍ଷା ଗୁଲମକ୍କୀ ଦଲାୱାଜି ହବିବ । ସାଜସଜ୍ଜା ପାଇଁ ଅର୍ଥ କେଉଁଠୁ ଆସିଲା ବୋଲି ନିର୍ବାହୀ ଅଧିକାରୀଙ୍କୁ ପ୍ରଶ୍ନ କଲେ ପୌର ଅଧ୍ୟକ୍ଷା । କୌଣସି ଉତ୍ତର ନମିଳିବାରୁ ଉପାଧ୍ୟକ୍ଷାଙ୍କ ନୂତନ ଗୃହରେ ତାଲା ପକାଇବାକୁ କହିଲେ ଗୁଲମକ୍କୀ ।
ମିଳିଥିବା ସୂଚନା ଅନୁଯାୟୀ, କାଉସିଲ ବୈଠକରେ ଉପାଧ୍ୟକ୍ଷାଙ୍କ ପାଇଁ ଏକ ନୂତନ ସ୍ବତନ୍ତ୍ର ଅଫିସ ଗୃହ ପୌରପାଳିକା ପରିସରରେ କରାଯିବା ପାଇଁ ନିଷ୍ପତ୍ତି ଗ୍ରହଣ କରାଯାଇଥିଲା । ଏହି କ୍ରମରେ ନିର୍ଦ୍ଧାରିତ ଗୃହରେ ଆଭ୍ୟନ୍ତରୀଣ ସାଜସଜ୍ଜା ହୋଇଥିଲା । ତେବେ ଏହି ସାଜସଜ୍ଜା ବାବଦକୁ ଅର୍ଥ କେଉଁଠୁ ଆସିଲା ସେନେଇ ପୌର ଅଧ୍ୟକ୍ଷା ଗୁଲମକ୍କୀ ଦଲାୱାଜି ହବିବ, ନିର୍ବାହୀ ଅଧିକାରୀଙ୍କୁ ପ୍ରଶ୍ନ କରିଥିଲେ । ତେବେ ଏନେଇ ତାଙ୍କ ପାଖରେ କୌଣସି ସୂଚନା ନଥିବା ନଥିବା ନିର୍ବାହୀ ଅଧିକାରୀ ପୌର ଅଧ୍ୟକ୍ଷାଙ୍କୁ କହିଥିଲେ ।
ତେଣୁ ଗୃହରେ ସାଜସଜ୍ଜା ବାବଦକୁ ଯେଉଁ ଅର୍ଥ ବ୍ୟୟ କରାଯାଇଛି ସେନେଇ ସଠିକ ଭାବେ ଅବଗତ ନହେବା ପର୍ଯ୍ୟନ୍ତ ସେଠାରେ ତାଲା ପଡିବ ବୋଲି ପୌର ଅଧ୍ୟକ୍ଷା ଅଡି ବସିଥିବା ଜଣାପଡିଛି । ଯାହାକୁ ନେଇ ଭଦ୍ରକ ପୌରପାଳିକାରେ ଅଚଳାବସ୍ଥା ସୃଷ୍ଟି ହୋଇଛି । ତେବେ ଏନେଇ ଖବର ପାଇ ଘଟଣା ସ୍ଥଳରେ ପୋଲିସ ପହଞ୍ଚି ସ୍ଥିତି ନିୟନ୍ତ୍ରଣ କରିବା ସହ ବୁଝାସୁଝା କରିଥିଲେ ।
ଇଟିଭି ଭାରତ, ଭଦ୍ରକ
