ଭଦ୍ରକ:ଆସୁଛି ଦୀପାବଳୀ । ଏନେଇ ପ୍ରସ୍ତୁତ ହେଉଛି ଭଦ୍ରକ ସହରର ଅଧିଷ୍ଠାତ୍ରୀ ଦେବୀ ମା' ଭଦ୍ରକାଳୀଙ୍କ ପୀଠ । ଏଠାରେ ସଦାସର୍ବଦା ପରମ ବୈଷ୍ଣବୀ ମା' ଭଦ୍ରକାଳୀ ବିଶ୍ଵମାତା ରୂପରେ ଭକ୍ତଙ୍କୁ ଦର୍ଶନ ଦିଅନ୍ତି । ହେଲେ ଜଗତ କଲ୍ୟାଣ ପାଇଁ କାଳୀପୂଜା ଠାରୁ ସାତ ଦିନ ପର୍ଯ୍ୟନ୍ତ ସପ୍ତମାତୃକା ବେଶରେ ଭକ୍ତମାନଙ୍କୁ ଦର୍ଶନ ଦିଅନ୍ତ ମା'। ଯାହାକି ଅନ୍ୟ ଦେବୀପୀଠ ଠାରୁ ଭିନ୍ନ ।
ଭଦ୍ରକ ସହର ଠାରୁ ମାତ୍ର ୯ କିଲୋମିଟର ଦୂର ପୁଣ୍ୟତୋୟା ସାଳନ୍ଦୀ ନଦୀ କୂଳରେ ଅବସ୍ଥିତ ମା' ଭଦ୍ରକାଳୀଙ୍କ ପୀଠ । ପୁରାଣ ପ୍ରସିଦ୍ଧ ଏହି ଶକ୍ତି ପୀଠ କୋରୋନା କାଳରେ ପୁରା ଖାଁ ଖାଁ ରହିଥିଲା । ଆଉ ଏବେ କାଳୀପୂଜା ପାଇଁ ସମ୍ପୂର୍ଣ୍ଣ ପ୍ରସ୍ତୁତ ହେଉଛି। ପରମ ବୈଷ୍ଣବୀ ମା' ଭଦ୍ରକାଳୀଙ୍କ ଦୀପାବଳୀ ଠାରୁ ୭ ଦିନ ପର୍ଯ୍ୟନ୍ତ ଅନୁଷ୍ଠିତ ହେଉଥିବା ସପ୍ତମାତୃକା ବେଶର ବେଶ ମହତ୍ତ୍ଵ ଥିବା ବିଶ୍ବାସ ରହିଛି। ସପ୍ତମାତୃକା ବେଶର ପ୍ରଥମ ଦିନ ମା' ବେଦମାତା ବେଶରେ ଭକ୍ତମାନଙ୍କୁ ଦର୍ଶନ ଦେବେ । ଏହାପରେ ସାତଦିନ ଧରି ସପ୍ତମାତୃକା ବେଶରେ ମା' ମହାକାଳୀ, ରାଜରାଜେଶ୍ବରୀ, ସିଂହବାହିନୀ, ଜଗଦ୍ଧାତ୍ରୀ, ମହା ସରସ୍ଵତୀ ଏବଂ ଶେଷରେ ମହାଲକ୍ଷ୍ମୀ ବେଶରେ ଭକ୍ତମାନଙ୍କୁ ଦର୍ଶନ ଦେବେ । ତେବେ ପ୍ରଶାସନିକ କଟକଣା ମଧ୍ୟରେ ବିନା ଭକ୍ତରେ ଚଳିତ ବର୍ଷ ବିଧି ରକ୍ଷା ପାଇଁ ଅନୁଷ୍ଠିତ ହେବ କାଳୀପୂଜା । ଯାହାକୁ ନେଇ ସେବାୟତ ଓ ଶ୍ରଦ୍ଧାଳୁଙ୍କ ମଧ୍ୟରେ କ୍ଷୋଭ ପ୍ରକାଶ ପାଇଛି ।
୭ ଦିନ ଧରି ଏହି ପୀଠରେ ସପ୍ତମାତୃକା ବେଶ ସହ ମଙ୍ଗଳ ଆଳତି, ସଂକୀର୍ତ୍ତନ, ଶତଚଣ୍ଡୀ ପାଠ, ଦୀପଯଜ୍ଞ ସହ ବିଶ୍ଵଶାନ୍ତି ମହାଯଜ୍ଞ ଅନୁଷ୍ଠିତ ହୁଏ । ଏଥିସହ ବେଦବିତ ବ୍ରାହ୍ମଣଙ୍କ ଦ୍ଵାରା ଏଠାରେ ସାତ ଦିନ ଧରି ଅନୁଷ୍ଠିତ ହୋଇଥାଏ ବିଶ୍ଵ ଶାନ୍ତି ମହାଯଜ୍ଞ । ମା'ଙ୍କ ସାନିଧ୍ୟ ଲାଭ କରିବା ପାଇଁ ବହୁ ଶ୍ରଦ୍ଧାଳୁ ବର୍ଷବ୍ୟାପୀ ପ୍ରତୀକ୍ଷା କରିଥାନ୍ତି । ହେଲେ ମାହାମାରୀ କୋରୋନା ଯୋଗୁଁ ସବୁକିଛି ଫିକା ପଡିଯାଇଛି । କୋରୋନା ପ୍ରକୋପ ଯୋଗୁଁ ଜାରି କରାଯାଇଥିବା କଟକଣାକୁ ପାଳନ କରିବା ପାଇଁ ଜିଲ୍ଲା ପ୍ରଶାସନ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି ବୋଲି ସୂଚନା ଦେଇଛନ୍ତି ଭଦ୍ରକ ଉପ ଜିଲ୍ଲାପାଳ ପିତାମ୍ବର ସାମଲ । ଏଥିସହ ଏହି ପୀଠର ବିଶେଷ ବର୍ଣ୍ଣନା ବହୁ ପୁରାତନ ବୋଲି କହିଛନ୍ତି ଗବେଷକ।