ଭଦ୍ରକ: ପୋଲିସ ମାଡରେ ଯୁବକ ଆହତ ହୋଇଥିବା ଅଭିଯୋଗ । ଯୁବକଙ୍କ ସାଙ୍ଗ ଝିଅ ନେଇ ପଳାଇଲା ବୋଲି ସାଙ୍ଗର ସାଙ୍ଗକୁ ପୋଲିସର ମାଡ ସହ ଟଙ୍କା ଲାଞ୍ଚ ମାଗିଛନ୍ତି । ଏମିତି ଏକ ଅଭିଯୋଗ ଆସିଛି ଭଦ୍ରକ ଜିଲ୍ଲା ଭଣ୍ଡାରିପୋଖରୀ ଥାନା ଅନ୍ତର୍ଗତ ଅରେଇକଣା ଅଞ୍ଚଳରୁ । ବର୍ତ୍ତମାନ ଗୁରୁତର ଯୁବକ ଭଦ୍ରକ ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇଛନ୍ତି ।
ଭିଡିଓ ସୌଜନ୍ୟ: ସମ୍ବାଦଦାତା, ଭଦ୍ରକ ସୂଚନା ଅନୁଯାୟୀ, ଅରେଇକଣା ଗାଁର ସଞ୍ଜୟ ସାହୁଙ୍କ ସାଙ୍ଗ ଯାଜପୁର ଜିଲ୍ଲା ଅନ୍ତର୍ଗତ ବିଂଝାରପୁର ଥାନାର ଜଣେ ନାବାଳିକ ଝିଅ ସହ 8ମାସ ହେଲା କେଉଁ ଆଡେ ପଳାଇଛନ୍ତି । ତେବେ ଏହି ଘଟଣାକୁ ଆଧାର କରି ଭଣ୍ଡାରିପୋଖରୀ ପୋଲିସ ସହାୟତାରେ ସଞ୍ଜୟଙ୍କୁ ବିଂଝାରପୁର ପୋଲିସ ଉଠାଇ ନେଇଥିଲା ।
ସେ ତାଙ୍କର ସାଙ୍ଗଙ୍କ ଫେରାର ସମ୍ପର୍କରେ ଜାଣିନଥିବା କହିଥିଲେ ସୁଦ୍ଧା ସେଠାରେ ତାଙ୍କୁ 2ଦିନ ଧରି ଲୁହା ପାଇପରେ ମାଡ ମାରିବା ସହ ଶାରୀରିକ ନିର୍ଯ୍ୟାତନା ଦିଆଯାଇଥିଲା । ପୋଲିସଙ୍କ ନାଁରେ ଏପରି ଅଭିଯୋଗ ଆଣିଛନ୍ତି ସଞ୍ଜୟ । ଏଥିସହ ବିଂଝାରପୁର ଥାନାର ଜଣେ ପୋଲିସ ତାଙ୍କୁ କହିଥିଲେ 10ହଜାର ଟଙ୍କା ଦେଲେ ଥାନାରୁ ଛାଡିଦିବି । ସଞ୍ଜୟଙ୍କ ଜାମିନ ପରେ ବି ସେହି ପୋଲିସ ତାଙ୍କୁ ଧମକ ମଧ୍ୟ ଦେଇଥିଲେ ଟଙ୍କା ନଦେଲେ ପୁଣି ଥାନାକୁ ନେଇଯିବେ । ଏଥିସହ ଟଙ୍କା କଥା ଯେପରି କେହି ନଜାଣନ୍ତି ଏପରି ଧମକ ଦେବା ସହ ସଞ୍ଜୟଙ୍କ ଆଧାରକାର୍ଡ, ଗାଡି ଲାଇସେନ୍ସ ଜବତ କରି ନେଇଛନ୍ତି ।
ସଞ୍ଜୟ ଏବେ ଗୁରୁତର ଭାବେ ଭଦ୍ରକ ମୁଖ୍ୟ ଚିକିତ୍ସାଳୟରେ ଚିକିତ୍ସିତ ହେଉଛନ୍ତି । ଏହି ଘଟଣାକୁ ନେଇ ସଞ୍ଜୟ ପୋଲିସର ଉପରିସ୍ଥ ଅଧିକାରୀଙ୍କ ପାଖରେ ଅଭିଯୋଗ କରିବେ ବୋଲି କହିବା ସହ ଉଚିତ ନ୍ୟାୟ ଦାବି କରିଛନ୍ତି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
