ବ୍ୟବସାୟୀ ଦମ୍ପତିଙ୍କୁ ଆକ୍ରମଣ, ଅଭିଯୁକ୍ତ ଫେରାର

ଧାମନଗର ହାଇସ୍କୁଲ ସାମ୍ନାରେ ଥିବା ଏକ ଲୁଗାଦୋକାନ ମାଲିକ ଏବଂ ତାଙ୍କ ସ୍ତ୍ରୀଙ୍କୁ ମରଣାନ୍ତକ ଆକ୍ରମଣ ହୋଇଛି ।

ଭଦ୍ରକ: ଧାମନଗର ହାଇସ୍କୁଲ ସାମ୍ନାରେ ଥିବା ଏକ ଲୁଗାଦୋକାନ ମାଲିକ ଏବଂ ତାଙ୍କ ସ୍ତ୍ରୀଙ୍କୁ ମରଣାନ୍ତକ ଆକ୍ରମଣ ହୋଇଛି । ଆକ୍ରମଣ କରିବା ସହ ମହିଳାଙ୍କ ସୁନା ଅଳଙ୍କାର ଲୁଟ ହୋଇଥିବା ଅଭିଯୋଗ ହୋଇଛି । ପୋଲିସ ଘଟଣାର ତଦନ୍ତ କରୁଛି ।

ସୂଚନାନୁସାରେ, ଧାମନଗର ବ୍ଲକର ଧାମନଗର ହାଇସ୍କୁଲ ସାମ୍ନାରେ ଥିବା ଏକ ଲୁଗା ଦୋକାନକୁ ଗତକାଲି ରାତି ପ୍ରାୟ ଦଶଟାରେ ବାହାଘର ପାଇଁ ଶାଢ଼ୀ କିଣିବା ପାଇଁ ଦୁଇ ଜଣ ଦୁର୍ବୃତ୍ତ ଆସିଥିଲେ । ଦୋକାନୀ ଲୁଗା ଦେଖାଇବା ସମୟରେ ଦୁଇ ଦୁର୍ବୃତ୍ତ ପ୍ରଥମେ ମାଲିକଙ୍କ ସ୍ତ୍ରୀ ସୁମତି ସାହୁଙ୍କୁ ଏକ ଚେୟାରରେ ଆକ୍ରମଣ କରିଥିଲେ।

ଏହା ଦେଖି ତାଙ୍କ ସ୍ବାମୀ ତାଙ୍କୁ ଅଟକାଇବା ପାଇଁ ଚେଷ୍ଟା କରୁଥିବା ସମୟରେ ଦୁର୍ବୃତ୍ତମାନେ ତାଙ୍କୁ ମଧ୍ୟ ନିର୍ଦ୍ଦୁମ ପିଟି ସୁମତି ପିନ୍ଧିଥିବା ସୁନା ଅଳଙ୍କାର ଲୁଟି ନେଇ ପଳାଇଥିଲେ। ପରେ ସ୍ଥାନୀୟ ଲୋକେ ଗୁରୁତର ଅବସ୍ଥାରେ ସ୍ବାମୀ ଏବଂ ସ୍ତ୍ରୀ ଦୁଇ ଜଣଙ୍କୁ ନିକଟସ୍ଥ ଧାମନଗର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ଘଟଣା ସ୍ଥଳରେ ଧାମନଗର ପୋଲିସ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛି । ଏ ପର୍ଯ୍ୟନ୍ତ ଅଭିଯୁକ୍ତଙ୍କ ବିଷୟରେ କିଛି ସୂଚନା ମିଳିପାରିନାହିଁ ।

ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ