ବରଗଡ: ବିଲକୁ ଯାଇଥିବାବେଳେ ଭାଲୁ ହାବୁଡରେ ପଡି ଯୁବକ ଗୁରୁତର। ଦୁଇଟି ଭାଲୁଙ୍କ ଆକ୍ରମଣରେ ଯୁବକ ଜଣକ ଗୁରୁତର ହୋଇପଡିଥିବାବେଳେ ତାଙ୍କୁ ସ୍ଥାନୀୟ ଲୋକେ ଉଦ୍ଧାର କରି ବୁର୍ଲା ମେଡିକାଲକୁ ଚିକିତ୍ସା ପାଇଁ ପଠାଇଛନ୍ତି । ଏପରି ଘଟଣା ଘଟିଛି ବରଗଡ ଜିଲ୍ଲା ପାଇକମାଳ ବ୍ଲକ କେରମେଲାବାହାଲ ଗ୍ରାମରେ ।
ଗ୍ରାମର ପ୍ରକାଶ ଚନ୍ଦ୍ର ନାଗ ନାମକ ଜଣେ ବ୍ୟକ୍ତି ଆଜି (ଶନିବାର) ବଡି ଭୋରରୁ ବିଲକୁ ଧାନ ଚାଷ ଦେଖିବା ପାଇଁ ଯାଇଥିବାବେଳେ ହଠାତ ଦୁଇଟି ଭାଲୁଙ୍କ ହାବୁଡରେ ପଡି ଯାଇଥିଲେ । ତାଙ୍କ ମୁଣ୍ଡ ଏବଂ ହାତରେ ବ୍ୟାପକ ଆଘାତ ହୋଇଥିଲା । ସ୍ଥାନୀୟ ଲୋକେ ତାଙ୍କୁ ବହୁ ଗୁରୁତର ଅବସ୍ଥାରେ ଉଦ୍ଧାର କରି ପ୍ରଥମେ ପଦ୍ମପୁର ଉପଖଣ୍ଡ ମେଡିକାଲରେ ଭର୍ତ୍ତି କରିଥିଲେ । ମାତ୍ର ସେଠାରେ ତାଙ୍କର ଅବସ୍ଥା ଗୁରୁତର ହେବାରୁ ତାଙ୍କୁ ବୁର୍ଲା ମେଡିକାଲକୁ ପଠାଇଦିଆଯାଇଛି ।
ବରଗଡରୁ ରାଜେଶ ସରାପ, ଇଟିଭି ଭାରତ