ବରଗଡ: ନାଳରୁ ଯୁବକଙ୍କ ମୃତଦେହ ଉଦ୍ଧାର କରାଯାଇଛି । ଗତକାଲି(ଶନିବାର)ଖଜୁରଟିକିରାର ଏକ ନାଳ ଭିତରୁ ଯୁବକଙ୍କ ମୃତଦେହ ଉଦ୍ଧାର କରାଯାଇଛି । ଖବରପାଇ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର କରିବା ସହ ବ୍ୟବଚ୍ଛେଦ କରି ପରିବାର ଲୋକଙ୍କୁ ହସ୍ତାନ୍ତର କରିଛି । ତେବେ ମୃତ୍ୟୁର କାରଣ ସ୍ପଷ୍ଟ ହୋଇନଥିବା ବେଳେ ମୃତକଙ୍କୁ ନିଜର ବୋଲି ଦାବି କରିଥିଲେ ଦୁଇ ପରିବାର । କିନ୍ତୁ ସତ୍ୟ ଜଣାପଡିବା ପରେ ପ୍ରକୃତ ପରିବାରଙ୍କୁ ମୃତଦେହ ହସ୍ତାନ୍ତର କରିଛି ପୋଲିସ । ମୃତକ ହେଲେ ଛତିଶଗଡର ନାଗେଶ୍ଵର ।
ସୂଚନା ଅନୁଯାୟୀ, ଗତକାଲି(ଶନିବାର) ଭୋରରୁ ଜଣେ ଯୁବକଙ୍କ ମୃତଦେହ ଖଜୁରଟିକିରାର ନାଳ ଭିତରେ ପଡିଥିବା ସ୍ଥାନୀୟ ଲୋକେ ଦେଖିଥିଲେ । ଏହାପରେ ପୋଲିସକୁ ଖବର ଦେଇଥିଲେ । ତେବେ ଘଟଣା ସ୍ଥଳକୁ ପୋଲିସ ଓ ଦମକଳ ବିଭାଗ ପହଞ୍ଚି ଉକ୍ତ ମୃତଦେହକୁ ଉଦ୍ଧାର କରିଥିଲେ । ତେବେ ସ୍ଥାନୀୟ ଲୋକେ ମୃତଦେହକୁ ଚିହ୍ନଟ କରିପାରି ନଥିବା ବେଳେ ବ୍ୟବଚ୍ଛେଦ ପାଇଁ ପୋଲିସ ଜିଲ୍ଲା ମୁଖ୍ୟାଳୟକୁ ପଠାଇଥିଲା । ତେବେ କିଛି ଘଣ୍ଟା ପରେ ମୃତ ଯୁବକ ନାଗେଶ୍ବରଙ୍କ ପରିବାର ଲୋକେ ଜିଲ୍ଲା ମୁଖ୍ୟ ଚିକିତ୍ସାଳୟକୁ ପହଞ୍ଚି ମୃତଦେହକୁ ଚିହ୍ନଟ କରିଥିଲେ । ନାଗେଶ୍ବରଙ୍କ ଘର ଛତିଶଗଡରେ ହୋଇଥିବା ବେଳେ ସେ ବରଗଡରେ ରହୁଥିଲେ ।