ବରଗଡ: ଧୁମଧାମରେ ପାଳିତ ହୋଇଛି ପଶ୍ଚିମ ଓଡ଼ିଶାର ଗଣପର୍ବ ନୂଆଁଖାଇ । ଆଉ ଏହି ପର୍ବ ସହ ଜୋଡି ହୋଇ ରହିଛି ଅନେକ ସଂସ୍କୃତି ଓ ପରମ୍ପରା । ସେହି ପରମ୍ପରା ମାନଙ୍କ ମଧ୍ୟରୁ ଗୋଟିଏ ହେଉଛି ପର୍ବରେ ବିଭିନ୍ନ ପତ୍ରର ବ୍ୟବହାର । ନୂଆଁଖାଇ ସହ ମହୁଲ, କୁରେଇ, ସର୍ଗୀ ପତ୍ର ଆଦି ନିବିଡ଼ ଭାବେ ଜଡ଼ିତ । କେଉଁ ଆବାହନ କାଳରୁ ଏହି ସବୁ ପତ୍ରରେ ନୂଆ ଖାଇବାର ପରମ୍ପରା ରହି ଆସିଛି । ଯାହାର ବୈଜ୍ଞାନିକ କାରଣ ରହିଥିବା ମଧ୍ୟ ଜଣାପଡିଛି । ବିଭିନ୍ନ ସଂପ୍ରଦାୟର ଲୋକେ ଭିନ୍ନ ଭିନ୍ନ ଗଛର ପତ୍ରରେ ନୂଆ ଖାଆନ୍ତି । କିଏ ସର୍ଗୀ ପତ୍ରରେ ତ କିଏ ମହୁଲ ପତ୍ର ଖଲି ଓ ଦନା ତିଆରି କରି ନୂଆଁଖାଇ ପର୍ବରେ ବ୍ୟବହାର କରୁଥିବା ବେଳେ ଅଧିକାଂଶ ଲୋକ କୁରେଇ ପତ୍ର ବ୍ୟବହାର କରିଥାନ୍ତି ।
ଭିଡିଓ ସୌଜନ୍ୟ: ସମ୍ବାଦଦାତା, ବରଗଡ଼ ପ୍ରାଚୀନ ଯୁଗରେ ମଣିଷ ନିଜ ଦ୍ବାରା ଉତ୍ପାଦିତ ଅନ୍ନକୁ ପ୍ରଥମେ ଠାକୁରଙ୍କ ଠାରେ ଅର୍ପଣ କରୁଥିଲା ଏବଂ ସେହିଠାରୁ ହିଁ ନୂଆଁଖାଇର ସୃଷ୍ଟି । ନୂଆ ଅନ୍ନ ଉତ୍ପାଦନ କରି ଭଗବାଙ୍କୁ ଅର୍ପଣ କରିବା ପରେ ସେହି ପ୍ରସାଦକୁ ନିଜେ ପରିବାର ସହ ଏକତ୍ରିତ ହୋଇ ଖାଇବାର ସୁ ପରମ୍ପରା ଆଜି ମଧ୍ୟ ଉଜ୍ଜୀବିତ । ଏବେ ବି ପଶ୍ଚିମ ଓଡ଼ିଶାବାସୀ ବଣଜଙ୍ଗଲରେ ଲହଡି ମାରୁଥିବା ପତ୍ରର ବ୍ୟବହାରକୁ ଭୁଲି ନାହାନ୍ତି । ବିଶେଷ କରି କୁରେଇ ପତ୍ର ଅନ୍ୟସମୟରେ ବ୍ୟବହାର ହେଉନଥିବା ବେଳେ ନୂଆଁଖାଇ ସମୟରେ ନିଜ ଇଷ୍ଟଦେବୀକୁ ନବାନ୍ନ ଅର୍ପଣ କରିବାପାଇଁ କୁରେଇ ପତ୍ରର ବ୍ୟବହାର ହୋଇଥାଏ । ଭାଦ୍ରବ ମାସରେ କୁରେଇ ପତ୍ରର ବାସ୍ନା ସାରା ପରିବେଶକୁ ମହକେଇ ଦେଇଥାଏ । ଶାସ୍ତ୍ରରେ ଏହାକୁ ଶୁଦ୍ଧିପତ୍ର ବୋଲି ମଧ୍ୟ କୁହାଯାଏ ।
ଏହି ଋତୁରେ ମହୁଲ, ସର୍ଗୀ ଓ କୁରେଇ ପତ୍ରର ଅନେକ ମହତ ଗୁଣ ରହିଥାଏ ଯାହାମଧ୍ୟରୁ ଏହାର ଓୌଷଧୀୟ ଗୁଣ ଅନ୍ୟତମ । ଯାହା ଖାଦ୍ୟକୁ ହଜମ କରିବାରେ ସହାୟକ ହୋଇଥାଏ । ଗରମ ଖାଦ୍ୟର ସଂସ୍ପର୍ଷରେ ଆସିଲେ କୁରେପତ୍ରରୁ ଏକ ରସାୟନିକ ଅଂଶ ବାହାରେ ଯାହା ଖାଦ୍ୟକୁ ହଜମ କରାଏ । ସେଥିପାଇଁ ଆମ ପୂର୍ବ ପୂରୁଷ ମାନେ ଏହି ଔଷଧୀୟ ଗୁଣ ସମ୍ପନ୍ନ ବୃକ୍ଷର ପତ୍ରକୁ ନୂଆଁଖାଇରେ ବ୍ୟବହାର କରୁଥିଲେ। ମହୁଲ ପତ୍ର ଓ କୁରେଇ ପତ୍ର ସହଜରେ ମିଳିବା ସହ, ଏହା ନୂଆଖାଇଁ ପାଇଁ ସ୍ବତନ୍ତ୍ର ଭାବେ ବ୍ୟବହାର ହୋଇଥାଏ ।
ବରଗଡ଼ରୁ ରାଜେଶ ସରାପ, ଇଟିଭି ଭାରତ
