ବରଗଡ: ସୋହେଲା ପୋଲିସକୁ ମିଳିଛି ସଫଳତା । ସୋହେଲା ଥାନା ଅନ୍ତର୍ଗତ ତବଡା ଗ୍ରାମରେ ହୋଇଥିବା ଲକ୍ଷାଧିକ ଟଙ୍କା ଓ ସୁନା ଗହଣା ଚୋରୀ ଘଟଣାରେ ପୋଲିସ 2 ଜଣ ଚୋରକୁ ଗିରଫ କରିଛି । ଏଥିସହ ସେମାନଙ୍କ ନିକଟରୁ ଚୋରି ହୋଇଥିବା ସମସ୍ତ ସୁନା ଗହଣା ଜବତ କରିଛି ପୋଲିସ । ଏନେଇ ସୋହେଲା ଥାନାରେ ହୋଇଥିବା ଏକ ସାମ୍ବାଦିକ ସମ୍ବିଳନୀରେ ପୋଲିସ ପକ୍ଷରୁ ସୂଚନା ଦିଆଯାଇଛି ।
ଲକ୍ଷାଧିକ ଟଙ୍କା ଓ ସୁନା ଗହଣା ସହ 2 ଚୋରଙ୍କୁ ଗିରଫ କଲା ସୋହେଲା ପୋଲିସ ସୂଚନା ଅନୁଯାୟୀ ଗତ 20 ତାରିଖରେ ସୋହେଲା ଥାନା ଅନ୍ତର୍ଗତ ତବଡା ଗ୍ରାମର ପଙ୍କଜ ମୋହନ ପାଣିଗ୍ରାହୀଙ୍କ 2 ଲକ୍ଷ 30 ହଜାର ଟଙ୍କା ଏବଂ 140 ଗ୍ରାମ ସୁନା ଗହଣା ଘରୁ ଚୋରି ହୋଇଯାଇଥିଲା । ସୋହେଲା ଥାନାରେ ଏନେଇ ଏକ ମାମଲା ରୁଜୁ ହେବାପରେ ସୋହେଲା ପୋଲିସ 7 ଦିନ ମଧ୍ୟରେ ଅଭିଯୁକ୍ତ ଦୁଇଜଣ ଚୋରଙ୍କୁ ଗିରଫ କରିବା ସହିତ 2 ଲକ୍ଷ 10 ହଜାର 900 ଟଙ୍କା ଏବଂ ଚୋରୀ ସୁନାକୁ ଉଦ୍ଧାର କରିବାରେ ସଫଳ ହୋଇଛି । ଗିରଫ ଅଭିଯୁକ୍ତଙ୍କୁ ଆଜି କୋର୍ଟକୁ ଚାଲାଣ କରାଯାଇଛି |
ବରଗଡରୁ ରାଜେଶ ସରାପ, ଇଟିଭି ଭାରତ
