ବରଗଡ: ପାଖଉଛି ନିର୍ବାଚନ ଆଉ ବଢି ଚାଲିଛି ନିର୍ବାଚନୀ ଉଷ୍ଣତା । ରାଜ୍ୟରେ ଆରମ୍ଭ ହୋଇଛି ଜୋରଦାର ନିର୍ବାଚନ ପ୍ରଚାର । ବିଭିନ୍ନ ଜିଲ୍ଲା ଗସ୍ତରେ ଆସୁଛନ୍ତି ସମସ୍ତ ରାଜନୈତିକ ଦଳର ତୁଙ୍ଗ ନେତା । ଏହି ଅବସରରେ ଆଜି ବରଗଡ ଆସୁଛନ୍ତି କଂଗ୍ରେସ ଅଧକ୍ଷ ରାହୁଲ ଗାନ୍ଧୀ |
ଜିଲ୍ଲା ସଦର ବ୍ଲକ ନୁଆଁ ସରସରାରେ ପରିବର୍ତ୍ତନ ସଂକଳ୍ପ ସମାବେଶରେ ଯୋଗ ଦେବେ ରାହୁଲ । ରାୟପୁରରୁ ଦିନ ୧୨ଟା ୩୦ ମିନିଟରେ ବାହାରି ଦିନ 1ଟାରେ ନୁଆଁ ସରସରା ଠାରେ ପହଞ୍ଚିବେ । ଆଉ ଏଠାରେ ଆୟୋଜିତ ସଭାରେ ଜନସାଧାରଣଙ୍କ ଠାରେ ତାଙ୍କର ଅଭିଭାଷଣ ରଖିବାର କାର୍ଯ୍ୟକ୍ରମ ରହିଛି | ଏଥିପାଇଁ ସମସ୍ତ ପ୍ରକାର ପ୍ରସ୍ତୁତି ଚୂଡାନ୍ତ ପର୍ଯ୍ୟାୟରେ ପହଞ୍ଚିଥିବା ବେଳେ କଂଗ୍ରେସ କର୍ମୀଙ୍କ ମହଲରେ ଉତ୍ସାହର ମାହୋଲ ଦେଖିବାକୁ ମିଳିଛି ।
ନିର୍ବାଚନୀ ବିଗୁଲ ବାଜିବା ପରେ କଂଗ୍ରେସ ଦଳ ପକ୍ଷରୁ ଜିଲ୍ଲାରେ ଏହା ପ୍ରଥମ ବଡ କାର୍ଯ୍ୟକ୍ରମ । ସାରା ଦେଶରେ ପରିବର୍ତ୍ତନ ଆଣିବା ପାଇଁ କଂଗ୍ରେସର ପରିବର୍ତ୍ତନ ସଂକଳ୍ପ ସମାବେଶ ଆୟୋଜନ କରାଯାଉଛି । ତେବେ ରାଜ୍ୟରେ ଦଳର ପତିଆରା ଧୀରେ ଧୀରେ ଲୋପ ପାଇବାକୁ ବସିଥିବାବେଳେ ରାହୁଲ ଗାନ୍ଧୀଙ୍କ ଗସ୍ତରେ କଂଗ୍ରେସ କର୍ମୀ ଓ ନେତା ଉତ୍ସାହିତ ହୋଇଉଠିଛନ୍ତି । ଅନ୍ୟପଟେ ପଡୋଶୀ ଛତିଶଗଡ ରାଜ୍ୟରେ କଂଗ୍ରେସ ସରକାର ଗଢିବା ପରଠାରୁ ବରଗଡରେ କଂଗ୍ରେସ କର୍ମୀ ଓ ନେତାଙ୍କ ଆଶା ଏବଂ ବିଶ୍ଵାସ ପୁଣି ଫେରିଆସିଛି । ଆଗାମୀ ସାଧାରଣ ନିର୍ବାଚନ ପାଇଁ ଅଣ୍ଟାଭିଡି ସାରିଛି ବରଗଡ ଜିଲ୍ଲା କଂଗ୍ରେସ ଦଳ |