ପଦ୍ମପୁର/ବରଗଡ: ପଦ୍ମପୁର ଉପନିର୍ବାଚନ ପାଇଁ ଆଜି ଶେଷ ହେଲା ପ୍ରଚାର । ପ୍ରଚାର ସମୟସୀମା ଶେଷ ହେବା ପରେ ପଦ୍ମପୁରର ବାହାର ଲୋକଙ୍କୁ ପଦ୍ମପୁର ଛାଡିବା ପାଇଁ ନିର୍ଦ୍ଦେଶ ଦେଇଛନ୍ତି ଜିଲ୍ଲାପାଳ ତଥା ଜିଲ୍ଲା ନିର୍ବାଚନ ଅଧିକାରୀ । ଏନେଇ ସଂଧ୍ୟାରେ ଜିଲ୍ଲାପାଳ ଓ ଏସପି ମିଳିତ ସମ୍ବାଦିକ ସମ୍ବିଳନୀ କରିଥିଲେ । ପ୍ରେସମିଟରେ ଜିଲ୍ଲା ନିର୍ବାଚନ ଅଧିକାରୀ ତଥା ଜିଲ୍ଲାପାଳ ମନୀଷା ବାନାର୍ଜୀ ସମସ୍ତ ଦଳର ନେତା ଓ ମନ୍ତ୍ରୀ ତଥା କାର୍ଯ୍ୟକର୍ତ୍ତାଙ୍କୁ ଜରୁରୀ ନିର୍ଦେଶ ଦେଇଥିଲେ ।
ଆଜି ଠାରୁ ପଦ୍ମପୁର ନିର୍ବାଚନ ମଣ୍ଡଳୀରେ କେବଳ ପଦ୍ମପୁର ଅଧିବାସୀ ବ୍ଯତୀତ ଅନ୍ୟ କେହି ରହିପାରିବେ ନାହିଁ। ସମସ୍ତ ବାହାର ଲୋକଙ୍କୁ ଆଜି ହିଁ ପଦ୍ମପୁର ନିର୍ବାଚନ ମଣ୍ଡଳୀ ଛାଡିବାକୁ ପଡିବ ବୋଲି ନିର୍ଦେଶ ଦେଇଛନ୍ତି । ଜିଲ୍ଲାପାଳ କହିଛନ୍ତି ରାତିରେ ସମସ୍ତ ହୋଟେଲ ଓ ଘର ଗୁଡିକୁ ଯାଞ୍ଚ କରାଯିବ । ପଦ୍ମପୁର ବାହାର ଲୋକ ଯଦି ପଦ୍ମପୁରରେ ଥିବେ ଆଇନ ଅନୁଯାୟୀ କଠୋର କାର୍ଯ୍ୟନୁଷ୍ଠାନ ଗ୍ରହଣ କରାଯିବ । ତେଣୁ ସମସ୍ତଙ୍କୁ ସମୟ ଭିତରେ ପଦ୍ମପୁଟ ତ୍ୟାଗ କରିବାକୁ ଜିଲ୍ଲାପାଳ ଅନୁରୋଧ କରିଛନ୍ତି । ଭୋଟର ମାନଙ୍କୁ ମଧ୍ୟ ଜିଲ୍ଲାପାଳ ନିର୍ଭୟରେ ଆସି ସକାଳ 7 ଟାରୁ ଅପରାହ୍ନ 4 ଟା ଭିତରେ ମତଦାନ କରିବାକୁ ଅପିଲ କରିଛନ୍ତି ।
ମତଦାନ ପ୍ରସ୍ତୁତି ସମ୍ପର୍କରେ ସୂଚନା ଦେଇ ଜିଲ୍ଲାପାଳ କହିଛନ୍ତି ସମୁଦାୟ 319 ଗୋଟି ବୁଥ କରାଯାଇଥିବା ବେଳେ 6 ଗୋଟି ପିଙ୍କ ବୁଥ 15 ଗୋଟି ମଡେଲ ବୁଥର ଆୟୋଜନ କରାଯାଇଛି । ବରଗଡ ଜିଲ୍ଲା ପୋଲିସ ବିଭାଗ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା କରାଯାଇଥିବା ନେଇ ବରଗଡ ଏସପି ସୂଚନା ଦେଇଛନ୍ତି । ସେହିପରି 45 ମୋବାଇଲ ପାର୍ଟି 15 ଟି ସେକ୍ଟର ପାର୍ଟି , 4 ଟି ସୁପରଭାଇଜିଂ ପାର୍ଟି , ବିଭିନ୍ନ ଗ୍ରାମ ବୁଥ ମାନଙ୍କୁ ଯାଇ ନିରୀକ୍ଷଣ କରିବେ । ଏତତ ବ୍ୟତୀତ 4 ଗୋଟି ସିନିୟର ସୁପରଭାଇଜରି ପାର୍ଟି ମଧ୍ୟ ରହିଛନ୍ତି । ନିର୍ବାଚନ ଶାନ୍ତିଶୃଙ୍ଖଳାର ସହ ଶେଷ କରିବା ପାଇଁ ପଦ୍ମପୁର ନିର୍ବାଚନ ମଣ୍ଡଳୀରେ 22 ଗୋଟି ନାକା କରାଯାଇଛି । ସେଥି ମଧ୍ୟରୁ 10 ଗୋଟି ନାକା ଛତିଶଗଡ ବୋର୍ଡରେ ରହିଥିବା ବେଳେ 12 ଗୋଟି ନାକା ଓଡିଶା ଭିତରେ ରହିଛି । ନିର୍ବାଚନ ଶେଷ ପର୍ଯ୍ୟନ୍ତ ସବୁ ନାକା ରହିବ । ତିନି ସିଫ୍ଟରେ ନାକା ରେ 24 ଘଣ୍ଟା ପୋଲିସ କାର୍ଯ୍ୟ କରିବେ ବୋଲି ଏସି ପରମାର ସ୍ମିଥ ସୂଚନା ଦେଇଛନ୍ତି ।
ଇଟିଭି ଭାରତ, ବରଗଡ