ବରଗଡ: ରାସ୍ତ ନୁହେଁ ତ କାଦୁଆ ପନ୍ତରା । ରାଜ୍ୟରେ ସଡକ ଯୋଜନା ସଫଳ ହୋଇଛି ପ୍ରତି ଗାଁରେ ପକ୍କା ରାସ୍ତା ହୋଇଥିବା କହି ବାଃ ବାଃ ନେଉଥିବା ସରକାର ଏ ଦୃଶ୍ୟ ଥରେ ଦେଖିବା ଦରକାର । ବିକାଶ ଖାଲି ନାମକୁ ମାତ୍ର । ରାସ୍ତା ନଥିବାରୁ ଖଟିଆରେ ରୋଗୀ ବୁହା ହେବା ଭଳି ପରିସ୍ଥିତି ଦେଖା ଦେଇଛି । ରାସ୍ତାର ଏପରି ଅବସ୍ଥା ଦେଖିବାକୁ ମିଳିଛି ବରଗଡ଼ ଜିଲ୍ଲା ଅତାବିରା ବିଧାନସଭା ନିର୍ବାଚନ ମଣ୍ଡଳୀ ବୁଗବୁଗା ପଞ୍ଚାୟତ ଅନ୍ତର୍ଗତ କଣ୍ଟାତଳ ଗାଁରେ ।
ରାଜ୍ୟ ଓ କେନ୍ଦ୍ର ସରକାରଙ୍କ ଦ୍ବାରା ଅନେକ ଯୋଜନାରେ ଗାଁକୁ ପକ୍କା ରାସ୍ତା ନିର୍ମାଣ ପାଇଁ କୋଟି କୋଟି ଟଙ୍କା ଖର୍ଚ୍ଚ ହେଉଛି । ହେଲେ କଣ୍ଟାତଳ ଗାଁ ପାଇଁ ଭଲ ରାସ୍ତାଟିଏ ସ୍ବପ୍ନ ପାଲଟିଛି । ଅସରାଏ ବର୍ଷାରେ ରାସ୍ତାରେ କାଦୁଅରେ ଭର୍ତ୍ତି ହେଉଛି । ରାସ୍ତାର ଅବସ୍ଥା ଏପରି ଯେ ସାଇକେଲ ଗାଡି ତ ଦୂରରେ ଥାଉ ଚାଲିକି ଯିବା ବି ମୁସ୍କିଲ । ଅନ୍ୟପକ୍ଷରେ ଏହି ଗ୍ରାମକୁ ସଂଯୋଗ କରୁଥିବା ପତ୍ରାପାଲି-ଭୁତଟିକ୍ରା ରାସ୍ତା ମଧ୍ୟ ବର୍ଷବର୍ଷ ଧରି ଶୋଚନୀୟ ହୋଇ ରହିଛି । ଫଳରେ କଣ୍ଟାତଳ ଗ୍ରାମବାସୀଙ୍କୁ ବହୁ ଅସୁବିଧାର ସମ୍ମୁଖୀନ ହେବାକୁ ପଡ଼ୁଛି ।