ବରଗଡ: ରାଜ୍ୟରେ ବଢୁଥିବା ଗ୍ରୀଷ୍ମ ପ୍ରକୋପରୁ ବଞ୍ଚିବା ଏକପ୍ରକାର କଷ୍ଟକର ହୋଇ ପଡିଛି । ଏମିତିରେ ଏସି ଓ କୁଲର ନ କିଣିପାରି ଅନେକେ ଘରର ଆଜବେଷ୍ଟସ ଛାତ ଉପରେ ପାଳ ପକାଇ ଘରକୁ ଥଣ୍ଡା ରଖିବାକୁ ଚେଷ୍ଟା କରୁଛନ୍ତି । ତେବେ ବରଗଡରେ ଏହାକୁ ନେଇ ଦେଖିବାକୁ ମିଳିଛି ଏକ ଅଭାବନୀୟ ଘଟଣା । ସଟସର୍କିଟ ଯୋଗୁଁ ଛାତ ଉପରେ ଥିବା ପାଳରେ ଲାଗିଥିଲା ଭୟାବହ ନିଆଁ । ହେଲେ ଅଗ୍ନିଶମ ବିଭାଗର ତତ୍ପରତା ଯୋଗୁଁ ବଞ୍ଚିଯାଇଥିଲେ ତିନୋଟି ପରିବାର ।
ଭିଡିଓ ସୌଜନ୍ୟ: ସମ୍ବାଦଦାତା, ବରଗଡ
ପ୍ରକାଶ ଯେ ଅତ୍ୟଧିକ ଗରମ ଯୋଗୁଁ ତିନୋଟି ପରିବାରର ସମସ୍ତେ ଘରେ ଶୋଇଥିବା ବେଳେ ହଠାତ୍ ସଟସର୍କିଟ ଯୋଗୁଁ ପାଳରେ ନିଆଁ ଲାଗିଯାଇଥିଲା । ଯାହାର ପ୍ରକୋପ ଏତେ ଅଧିକ ଥିଲା କି ସାହି ପଡିଶାରୁ ସମସ୍ତେ ଘରୁ ବାହାରି ଆସିଥିଲେ । ପରେ ଘର ଭିତରେ ଗରମ ବଢିଯିବାରୁ ପରିବାର ଲୋକେ ମଧ୍ୟ ବାହାରକୁ ଆସି ଛାତରେ ନିଆଁ ଲାଗିଥିବେ ଦେଖିଥିଲେ । ତୁରନ୍ତ ଅଗ୍ନିଶମ ବିଭାଗକୁ ଖବର କରାଯିବା ପରେ କିଛି ମୁହୂର୍ତ୍ତରେ ଘଟଣାସ୍ଥଳରେ ପହଞ୍ଚିଯାଇଥିଲା ବିଭାଗ ।