ବରଗଡ: ବିଜେପୁର ଉପନିର୍ବାଚନ ପାଇଁ ପ୍ରଚାରର ଥିଲା ଶନିବାର ଶେଷ ଦିନ । ୨୧ ତାରିଖରେ ବିଜେପୁର ଉପନିର୍ବାଚନ ହେବାକୁ ଥିବା ବେଳେ ଆଜିଠାରୁ ବନ୍ଦ ହୋଇଛି ସମସ୍ତ ଦଳର ପ୍ରଚାର ପ୍ରସାର । ନିଜ ନିଜ ଦଳର ପ୍ରାର୍ଥୀ ସପକ୍ଷରେ ପ୍ରଚାରର ଶେଷ ଦିନରେ ଦଳୀୟ ନେତା ଓ କର୍ମୀ ପ୍ରଚାର କରିଥିଲେ । ଏପଟେ ବାହାର ଅଞ୍ଚଳ ନେତାଙ୍କୁ ବିଜେପୁର ନିର୍ବାଚନ ମଣ୍ଡଳୀରୁ ବାହାରକୁ ଯିବାକୁ ପଡିଛି ।
ଭିଡିଓ ସୌଜନ୍ୟ- ସମ୍ବାଦଦାତା,ବରଗଡ ବିଜେପୁର ନିର୍ବାଚନ ମଣ୍ଡଳୀର ବରପାଲି , ବିଜେପୁର ଓ ଗାଇସିଲେଟ ଅଞ୍ଚଳରେ ପ୍ରଚାର ପ୍ରସାର ଦାୟିତ୍ଵରେ ରହିଥିବା ସମସ୍ତ ଦଳର ବଡ ବଡ ନେତାଙ୍କୁ ଶନିବାର ବିଜେପୁର ନିର୍ବାଚନ ମଣ୍ଡଳୀ ଛାଡିବାକୁ ପଡିଛି । ଘର ଘର ଯାଇ ପ୍ରଚାର କରିବା, ମାଇକରେ ପ୍ରଚାର କରିବା ବନ୍ଦ ହୋଇଥିବାବେଳେ ବୁଥ ନିକଟରେ ଲାଗିଥିବା ସମସ୍ତ ଦଳର ପୋଷ୍ଟର ଏବଂ ବ୍ୟାନର ଗୁଡିକୁ ଆସନ୍ତାକାଲି ହଟାଯିବ ।
ତେବେ ଶନିବାର ଶେଷ ଦିନରେ ବିଜେଡି ଏବଂ ବିଜେପି ଦଳର ନେତାଙ୍କ ପ୍ରଚାର ଖୁବ ଜୋରରେ ଲାଗିଥିବା ଦେଖିବାକୁ ମିଳିଥିବା ବେଳେ କଂଗ୍ରେସ ଦଳର ପ୍ରଚାରରେ ମାନ୍ଦା ଦେଖାଯାଇଥିଲା । କେବଳ ଦିଲ୍ଲୀପ ପଣ୍ଡା ତାଙ୍କ ସହଯୋଗୀଙ୍କ ସହ ପ୍ରଚାର କରୁଥିବା ବେଳେ ବିଜେଡି ଦଳର ମନ୍ତ୍ରୀ ଅରୁଣ ସାହୁ , ମନ୍ତ୍ରୀ ସୁଶାନ୍ତ ସିଂ, ବିଜେଡି ଦଳର ଉପମୁଖ୍ୟ ସଚେତକ ରୋହିତ ପୂଜାରୀଙ୍କର ନେତୃତ୍ବରେ କର୍ମୀ ମାନେ ଘର ଘର ବୁଲି ଦଲୀୟ ପ୍ରାର୍ଥୀ ରୀତା ସାହୁଙ୍କ ପାଇଁ ଭୋଟ ଭିକ୍ଷା କରିଥିଲେ ।
ଅନ୍ୟପଟେ ବିଜେପି ଦଳର ପ୍ରାର୍ଥୀ ସନତ ଗଡ଼ତିଆଙ୍କ ପାଇଁ ବିଜେପି ଦଳର ବସନ୍ତ ପଣ୍ଡା , ସୁରେଶ ପୁଜାରୀ , ଅଶ୍ଵିନୀ ଷଡଙ୍ଗୀ ଆଦି ଶେଷ ପ୍ରଚାରରେ ଲାଗି ପଡିଥିଲେ । ତେବେ ଏତେ ଦିନର ପ୍ରଚାର ପରେ ବିଜେପୁର ବାସୀଙ୍କୁ କେଉଁ ଦଳ ପ୍ରଭାବିତ କରିଛି ଏବଂ କାହା ଉପରେ ଏଠାକାର ବୁଦ୍ଧିଜୀବୀ ଆସ୍ଥା ପ୍ରକଟ କରୁଛନ୍ତି ତାହା ଫଳାଫଳ ପରେ ହିଁ ଜଣାପଡିବ ।
ବରଗଡରୁ ରାଜେଶ ସରାପ, ଇଟିଭି ଭାରତ
