ବାଲେଶ୍ବର: ଶ୍ବଶୁର ଘରେ ତାଣ୍ଡବ ରଚିଛି ଜ୍ବାଇଁ । ଜଳେଶ୍ବର ଅଞ୍ଚଳରେ ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି । ଶାଶୁ, ଶଳା, ଶ୍ବଶୁରଙ୍କୁ ମରାଣାନ୍ତକ ଆକ୍ରମଣ କରିଛି ଜ୍ବାଇଁ । ଜ୍ବାଇଁର ଦୌରାତ୍ମ୍ୟରୁ ବର୍ତ୍ତି ପାରି ନାହିଁ ପୋଲିସ । ଗ୍ରାମବାସୀଙ୍କ ସହାୟତାରେ ଜ୍ବାଇଁକୁ କାବୁ କରି ଥାନାକୁ ପଠାଯାଇଛି । ଜ୍ବାଇଁର ଆକ୍ରମଣରେ କ୍ଷତବିକ୍ଷତ ସମସ୍ତଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି ।
ଘଟଣାଟି ଜଳେଶ୍ବର ଥାନା ନାମ୍ପୋ ଫାଣ୍ଡି ଅଧିନସ୍ଥ ଖାଲିନା ଗ୍ରାମରେ ଜନୈକ ଯୁବକ ନିଜ ଶଶୁର ଘରେ ଉନ୍ମତ୍ତ କାଣ୍ଡ ଭିଆଇଛି । ଶାଶୁ,ଶଶୁର ଓ ଶଳା ସମେତ ଛଅ ଜଣକୁ ଧାରୁଆ ଅସ୍ତ୍ରରେ ହାଣିଥିବା ବେଳେ ଶ୍ବଶୁର ଅବସ୍ଥା ଗୁରୁତର ରହିଛି । ଅନ୍ୟପକ୍ଷରେ ଉନ୍ମତ କାଣ୍ଡ ଭିଆଇ ଥିବା ଏହି ଯୁବକକୁ ଆୟତ୍ତ କରିବାକୁ ନାମ୍ପୋ ଫାଣ୍ଡି ପୁଲିସକୁ ନାକେଦମ ହେବାକୁ ପଡିଥିଲା ।
ଗ୍ରାମବାସୀଙ୍କ ସୁତ୍ରରୁ ମିଳିଥିବା ଖବର ଅନୁଯାୟୀ, ଖାଲିନା ଗ୍ରାମର ନିଳାମ୍ବର ପାଣିଗ୍ରାହୀଙ୍କ ଘରକୁ ଆଜି ସକାଳେ ତାଙ୍କ ଜ୍ବାଇଁ ଆରୁହାବୃତ୍ତି ଗ୍ରାମର ରଞ୍ଜନ ପଣ୍ଡା(୨୮) ଆସିଥିଲେ । ଶ୍ବଶୁର ଘରେ ପତ୍ନୀ କାହିଁକି ରହିଛି କହି ଉଗ୍ର ରୂପ ଧାରଣ କରିଥିଲେ ଜ୍ବାଇଁ । ଏହା ପରେ ଘରୁ ଧରି ଆସିଥିବା ଏକ ପନିକି ଓ କଟା ଦେଖାଇ ଧମକ ଦେଇଥିଲା । ଆଉ ଶେଷରେ ଏଥିପାଇଁ ତାଙ୍କ ଶାଶୁ ଜୟନ୍ତୀକୁ ଦାୟୀ କରି ତାଙ୍କ ତଣ୍ଟିରେ ଧାରୁଆ ଅସ୍ତ୍ର ଲଗାଇ ଧମକ ଦେଇଥିଲା । ରକ୍ତମୁଖା ସିଜିଥିବା ଜ୍ବାଇଁ ରଞ୍ଜନକୁ ରୋକିବାକୁ ଯିବାରୁ ଶଳା ସିପୁନ(୧୫), ଶାଳି ସସ୍ମିତା, ଗ୍ରାମର ଜଗା ଦାସ(୨୬), ବିଶ୍ବଜିତ ଦାସ(୨୮)ଙ୍କୁ ହାଣିଥିଲା ।