ପେଟ୍ରୋଲ ପମ୍ପରେ ଲୁଟେରାଙ୍କ ଦୌରାତ୍ମ୍ୟ: କର୍ମଚାରୀଙ୍କୁ ମାଡ ମାରିଲେ, ଟଙ୍କା ଲୁଟିଲେ

ବାଲେଶ୍ୱର ଜିଲ୍ଲା ଭୋଗରାଇ ଅଞ୍ଚଳରେ କିଛି ଦୁର୍ବୃତ୍ତ ଏକ ପେଟ୍ରୋଲ ପମ୍ପ ଭଙ୍ଗାରୁଜା କରିବା ସହ ଟଙ୍କା ଲୁଟି ନେଇଥିବା ଅଭିଯୋଗ ହୋଇଛି ।

ବାଲେଶ୍ବର: ପୁଣି ଲୁଟେରାଙ୍କ ଟାର୍ଗେଟରେ ପେଟ୍ରୋଲ ପମ୍ପ । ଭୋଗରାଇ ଅଞ୍ଚଳରେ ଥିବା ଇଣ୍ଡିଆନ ଅଏଲର ପେଟ୍ରୋଲ ପମ୍ପକୁ ଟାର୍ଗେଟ କରିଛନ୍ତି ଲୁଟେରା । ପମ୍ପ କର୍ମଚାରୀଙ୍କୁ ମାଡ ମାରିବା ସହ ଟଙ୍କା ଲୁଟିନେଇଥିବା ଅଭିଯୋଗ ହୋଇଛି ।

ଲୁଟ କରିବା ପରେ ଘଟଣାସ୍ଥଳରୁ ଫେରାର ହୋଇଯାଇଛନ୍ତି ଦୁର୍ବୃତ୍ତ । ସୂଚନା ଅନୁଯାୟୀ, ଗୁରୁବାର ହଠାତ୍ ପେଟ୍ରୋଲ ପମ୍ପକୁ ପଶି ଆସିଥିଲେ କିଛି ଦୁର୍ବୃତ୍ତ । କେହି କିଛି ବୁଝିବା ଆଗରୁ ଦୁର୍ବୃତ୍ତମାନେ ପମ୍ପ କର୍ମଚାରୀଙ୍କୁ ମାଡ ମାରିବା ସହ ପେଟ୍ରୋଲ ପମ୍ପ କାର୍ଯ୍ୟାଳୟର କାଚ ଭାଙ୍ଗି ସମସ୍ତ ଟଙ୍କା ଲୁଟି ନେଇଥିଲେ ।

ଏନେଇ ପମ୍ପ ମାଲିକ ଭୋଗରାଇ ଥାନାରେ ଅଭିଯୋଗ କରିଛନ୍ତି । ସିସିଟିଭି ଫୁଟେଜ ଆଧାରରେ ପୋଲିସ ତଦନ୍ତ ଆରମ୍ଭ କରିଛି ।

ବାଲେଶ୍ବରରୁ ଜୀବନଜ୍ୟୋତି ନାୟକ, ଇଟିଭି ଭାରତ