ବାଲେଶ୍ବର:ରାତିପାହିଲେ ମହାଦେବଙ୍କ ଜାଗରଯାତ୍ରା । ଜାଗର ପାଇଁ ସଜେଇ ହେଲାଣି ରାଜ୍ୟର ବିଭିନ୍ନ ଶୈବପୀଠ । ଆଜି ହେଉଛି ଏକବାର, ଭୋଳା ଶଙ୍କରଙ୍କ ଆରାଧନା ଲାଗି ଉପବାସ କରିଛି ଭକ୍ତ । ଅରୁଆ ଖାଇ ଆସନ୍ତାକାଲି ଜାଗରରେ ଦୀପ ଜାଳିବେ । ଏହି ପବିତ୍ର ମହାଶିବରାତ୍ରୀ ଉପଲକ୍ଷେ ବାଲେଶ୍ଵର ସହରର ପଟ୍ଟଚିତ୍ର ଶିଳ୍ପୀ ଦେବାଶିଷ ସାହୁ ଡ଼ମ୍ବରୁରେ ମହାଦେବଙ୍କ ଆକର୍ଷଣୀୟ ଚିତ୍ର ଅଙ୍କନ କରି ଭକ୍ତି ନୈବେଦ୍ୟ ଅର୍ପଣ କରିଛନ୍ତି । ସେ ଏକ ଡ଼ମ୍ବରୁରେ ଫେବ୍ରିକ ରଙ୍ଗ ବ୍ୟବହାର କରି ଭଗବାନ ଶିବଙ୍କର ପ୍ରତିଛବି ଆଙ୍କିଛନ୍ତି । ଏହାକୁ ପ୍ରସ୍ତୁତ କରିବାକୁ ତାଙ୍କୁ ପ୍ରାୟ ଅଧଘଣ୍ଟା ସମୟ ଲାଗିଥିଲା ।
ବାଲେଶ୍ବରର ଦେବାଶିଷ ପଟ୍ଟଚିତ୍ର ଶିଳ୍ପୀ ଭାବେ ସାରା ଅଞ୍ଚଳରେ ବେଶ୍ ପରିଚିତ । ପଟ୍ଟଚିତ୍ରକୁ କେବଳ କାଗଜରେ ସୀମିତ ନରଖି ସବୁ ଜିନିଷ ଉପରେ ଚମକାଇବାକୁ ସେ ଚେଷ୍ଟା କରୁଛନ୍ତି । ପର୍ସ, ଝିଅମାନଙ୍କ ହ୍ୟାଣ୍ଡ ବ୍ୟାଗ୍, ସାଇଡ୍ ବ୍ୟାଗ୍, ଟି-ସାର୍ଟ, ଯେକୌଣସି ଫୁଲ ଏବଂ ପାନ ପତ୍ର ଉପରେ ସେ ଅତି ନିଖୁଣତାର ସହ ପଟ୍ଟଚିତ୍ର କାମ କରୁଛନ୍ତି । ଫେସବୁକ୍ ମାଧ୍ୟମରେ ତାଙ୍କ ହାତ ତିଆରି ପଟ୍ଟଚିତ୍ର ପ୍ରତି ଆକର୍ଷିତ ହୋଇ ଡ୍ରେସ୍, ବ୍ୟାଗ୍ ଉପରେ ଏହି କଳାକୃତି କରିବା ପାଇଁ ଅନେକ ଲୋକଙ୍କ ପାଖରୁ ଅର୍ଡର ଆସୁଛି । ପିଲାଟି ବେଳୁ ଦେବାଶିଷଙ୍କ ଚିତ୍ରକଳା ପ୍ରତି ବେଶ ଆଗ୍ରହ ରହିଥିଲା । ହେଲେ ସମୟାନୁକ୍ରମେ ସେ ପାଠପଢ଼ାରେ ବ୍ୟସ୍ତ ରହିଯିବା ଯୋଗୁଁ ପ୍ରଶିକ୍ଷଣ ନେଇପାରିନଥିଲେ ।