ବାଲେଶ୍ବର: ଦିନ କେଇଟା ପରେ ଓଡିଶାର ପ୍ରମୁଖ ପର୍ବ ରଜ । ଏନେଇ ଏବେଠୁ ସଜବାଜ ହେଲାଣି ରଜ ବଜାର । ତେବେ ଓଡିଆଙ୍କ ଏହି ପ୍ରମୁଖ ପର୍ବରେ ୩ ଦିନ ପିଠାପଣା ସାଙ୍ଗକୁ ପାନ ଖାଇବାର ଏକ ନିଆରା ମଜା ନିଅନ୍ତି ଲୋକ । ତେବେ ବାଲେଶ୍ବର ଜିଲ୍ଲା ଧାନ, ପାନ, ମୀନର ଜିଲ୍ଲା ହୋଇଥିବା ବେଳେ ପାନ ଖାଇବା ଏଠାକାର ଏକ ନିଆରା ଅନୁଭୁତି । ରଜରେ ଏଠାକାର ଲୋକଙ୍କୁ ବିଭିନ୍ନ ପ୍ରକାରର ପାନ ଖୁଆଇବା ପାଇଁ ଦୋକାନୀମାନେ ଆରମ୍ଭ କରିସାରିଲେଣି ସମସ୍ତ ପ୍ରସ୍ତୁତି ।
ତେବେ ବାଲେଶ୍ବରରେ ରଜ 3 ଦିନରେ ପାନ କଥା କହିଲେ ପ୍ରଥମେ ଫାଣ୍ଡିଛକରେ ଥିବା ରଞ୍ଜନ ଦାଶଙ୍କ ପାନ ଦୋକାନ କଥା ମନ ଭିତରକୁ ଆସେ । ରଞ୍ଜନ ଜଣେ ଓଡ଼ିଆ ବିଭାଗରେ ସ୍ନାତକୋତ୍ତର ଛାତ୍ର ହୋଇଥିଲେ ମଧ୍ୟ ପାନ ଦୋକାନ କରି ଲୋକଙ୍କୁ ଆକୃଷ୍ଟ କରିବାର କଳା ରଖିଛନ୍ତି । କାରଣ ବାଲେଶ୍ବର ସହରର ଅନ୍ୟ ପାନ ଦୋକାନରେ ବିଶେଷ ଭାବେ ୧୦ରୁ ୨୦ ଟଙ୍କା ଭିତରେ ପାନ ଦେଖିବାକୁ ମିଳେ । ହେଲେ ରଞ୍ଜନଙ୍କ ପାନ ଦୋକାନରେ ସାଦା ପାନର ମୂଲ୍ୟ ୧୦ ଟଙ୍କା ଭିତରେ ରହିଥିବା ବେଳେ ପାନର ସ୍ବାଦ ଅନୁଯାୟୀ ଏହା ୨୦୦ଟଙ୍କା ଯାଏ ମଧ୍ୟ ବୃଦ୍ଧି ପାଇଥାଏ ।