ବାଲେଶ୍ବର: କଂଗ୍ରେସ ସରକାର ଆସିଲେ ଚାଷୀ ଓ ଯୁବକମାନଙ୍କୁ ଦିଆଯିବ ପ୍ରାଧାନ୍ୟ । କଂଗ୍ରେସ ଯେତେବେଳେ ଯାହା ପ୍ରତିଶୃତି ଦେଇଛି ତାହା ପୂରଣ କରିଛି । ସେଥିପାଇଁ କଂଗ୍ରେସକୁ ସମର୍ଥନ କରିବା ସହ ପ୍ରାର୍ଥୀମାନଙ୍କୁ ଜିତାଇବା ପାଇଁ ଆହ୍ବାନ ଦେଇଥିଲେ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ।
ଶୁକ୍ରବାର ବାଲେଶ୍ୱର ଜିଲ୍ଲା ରେମୁଣା ନିର୍ବାଚନ ମଣ୍ଡଳୀର ନରହରିପୁର ପଡିଆରେ ପରିବର୍ତ୍ତନ ସଂକଳ୍ପ ସମାବେଶରେ ଯୋଗ ଦେଇ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ କେନ୍ଦ୍ର ଓ ରାଜ୍ୟ ସରକାରଙ୍କ ଉପରେ ବର୍ଷିଥିଲେ ।
କେନ୍ଦ୍ର ସରକାର 2କୋଟି ନିଯୁକ୍ତି ଦେବାର ପ୍ରତିଶୃତି ପାଳନ କରି ନଥିବା ବେଳେ ରାଜ୍ୟରେ ନବୀନ ପଟ୍ଟନାୟକ 19 ବର୍ଷ ଶାସନ କରି ଯୁବକଙ୍କୁ ପ୍ରତାରଣା କରିଛନ୍ତି ବୋଲି କହିଛନ୍ତି ରାହୁଲ । ସରକାରୀ ସ୍ତରରେ 2ଲକ୍ଷରୁ ଅଧିକ ପଦବୀ ଫାଙ୍କା ପଡିଥିବା ବେଳେ ଯୁବକମାନେ ଖାଲି ସାର୍ଟିଫିକେଟ ନେଇ ହତାଶ ହୋଇ ବୁଲୁଛନ୍ତି । ସେହିପରି ନରେନ୍ଦ୍ର ମୋଦି ଗରିବର ଟଙ୍କା ଲୁଟି ଫେରାର ହୋଇଥିବା ଲୋକଙ୍କୁ ଘଣ୍ଟ ଘୋଡାଉଛନ୍ତି । ଘରୋଇ କମ୍ପାନୀକୁ ଲାଭ ଦେବାଭଳି ଯୋଜନା କରି ସାଧାରଣ ଲୋକଙ୍କ ଆଖିରେ ମୋଦି ଧୂଳି ଦେଉଛନ୍ତି । ଲୋକଙ୍କ ଖାତାରେ 15 ଲକ୍ଷ ଜମା କରିବା ଠାରୁ ବିମୁଦ୍ରୀକରଣ ପର୍ଯ୍ୟନ୍ତ ସବୁଥିରେ ମୋଦି ଜନତାଙ୍କୁ ଧୋକା ଦେଇଛନ୍ତି ବୋଲି ରାହୁଲ କହିଥିଲେ ।
ତେବେ କଂଗ୍ରେସ ଆସିଲେ ଗରିବ ଲୋକଙ୍କୁ ବର୍ଷକୁ 72 ହଜାର ଟଙ୍କା, ଧାନ କ୍ୱିଣ୍ଟାଲ ପିଛା 26ଶହ ଟଙ୍କା, ଏହା ସହ ଯୁବକଙ୍କୁ ନିଯୁକ୍ତି ଦିଆଯିବ ବୋଲି ପ୍ରତିଶ୍ରୁତି ଦେଇଛନ୍ତି ରାହୁଲ । ଏହି ପରିବର୍ତ୍ତନ ସଂକଳ୍ପ ସମାବେଶରେ ରାହୁଲ ସମସ୍ତ ପ୍ରାର୍ଥୀମାନଙ୍କୁ ଭୋଟ ଦେବାପାଇଁ ନିବେଦନ କରିଥିଲେ । ଅନ୍ୟମାନଙ୍କ ମଧ୍ୟରେ ପିସିସି ସଭାପତି ନିରଞ୍ଜନ ପଟ୍ଟନାୟକ, ନରସିଂହ ମିଶ୍ର, ସନ୍ତୋଷ ସିଂ ସାଲୁଜା, ଶରତ ପଟ୍ଟନାୟକ ସାମିଲ ହୋଇ ପ୍ରାର୍ଥୀମାନଙ୍କ ପାଇଁ ଭୋଟ ଭିକ୍ଷା କରିଥିଲେ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ