ମୃତଶିଶୁକୁ ଝୁଣି ଖାଇଗଲେ ବୁଲା କୁକୁର

ସୋର ପରେ ଏବେ ବାଲେଶ୍ବର ମୁଖ୍ୟ ଚିକିତ୍ସାଳୟ ପରିସରରେ ପଡ଼ିରହିଛି ନବଜାତ ଶିଶୁର ମୃତଦେହ । ଆଉ ଶିଶୁଟିକୁ କୁକୁର ଖାଉଥିବା ଦେଖିବାକୁ ମିଳିଛି । ଏପରି ଘଟଣା ବାରମ୍ବାର ଘଟିବା ନେଇ ସ୍ଥାନୀୟ ଅଞ୍ଚଳରେ ଅସନ୍ତୋଷ ପ୍ରକାଶ ପାଇଛି ।

ବାଲେଶ୍ବର: ଜିଲ୍ଲା ମୁଖ୍ୟ ଚିକିତ୍ସାଳୟରେ ଦେଖିବାକୁ ମିଳିଛି ଅଭାବନୀୟ ଘଟଣା । ଏକ ନବଜାତ ଶିଶୁର ମୃତଦେହକୁ କୁକୁର ଟାଣି ଖାଉଥିବା ଦୃଶ୍ୟ ଦେଖିବାକୁ ମିଳିଛି ।

ବୁଧବାର ଅପରାହ୍ନରେ ଜିଲ୍ଲା ମୁଖ୍ୟ ଚିକିତ୍ସାଳୟର ମା’ ଓ ଶିଶୁ ବିଭାଗ ନିକଟରେ ନବଜାତ ଶିଶୁର ମୃତ ଶରୀରକୁ କୁକୁରମାନେ ଖାଉଥିବା ଦେଖିବାକୁ ମିଳିଥିଲା । ସେଠାରେ ଥିବା ରୋଗୀଙ୍କ ସମ୍ପର୍କୀୟମାନେ ଏହି ଦୃଶ୍ୟ ଦେଖି ମେଡିକାଲ କର୍ତ୍ତୃପକ୍ଷଙ୍କୁ ଖବର ଦେଇଥିଲେ । ପରେ ମେଡିକାଲର ସଫେଇ କର୍ମଚାରୀ ମୃତ ଶିଶୁକୁ ସେଠାରୁ ନେଇ ଅନ୍ୟତ୍ର ଫିଙ୍ଗିଥିବା ଜଣାପଡିଛି ।

ଶିଶୁଟି କାହାର ଓ କେଉଁ ପରିସ୍ଥିତିରେ ସେଠାକୁ ଆସିଲା ସେ ବିଷୟରେ ମେଡିକାଲ ପକ୍ଷରୁ କୌଣସି ସୂଚନା ମିଳିନଥିବା ବେଳେ ମୃତଦେହଟି ପଚିଯାଇଥିବାରୁ ତାହା ପୁଅ କି ଝିଅ ଚିହ୍ନଟ କରିଯାଇ ନାହିଁ । ତେବେ ଗତ କିଛିଦିନ ପୂର୍ବରୁ ଏପରି ଘଟଣା ସୋର ମେଡିକାଲ ପରିସରରେ ହୋଇଥିବା ବେଳେ ଆଜି ପୁଣି ମୁଖ୍ୟ ଚିକିତ୍ସାଳୟରେ ସମାନ ଘଟଣା ଘଟିବା ପ୍ରଶାସନିକ ଅବହେଳାକୁ ପଦାରେ ପକାଇଛି ।

ବାଲେଶ୍ବରରୁ ଜୀବନଜ୍ୟୋତି ନାୟକ, ଇଟିଭି ଭାରତ