ବ୍ରାଉନ ସୁଗାର ବିକିବାକୁ ଆସି ଗଛରେ ବନ୍ଧା ହେଲେ ଯୁବକ

ଗାଁରେ ବୁଲୁଛନ୍ତି ବ୍ରାଉନସୁଗାର ବେପାରୀ । କିନ୍ତୁ ବେପାର ସାଜିଲା କାଳ । ଗ୍ରାମବାସୀ କୌଣସି ସୂତ୍ରରୁ ଖବର ପାଇ ଦୁଇଜଣ ଯୁବକଙ୍କ ନିକଟରୁ ବ୍ରାଉନସୁଗାର ଜବତ କରିବା ସହ ଗଛରେ ବାନ୍ଧି ।

ବାଲେଶ୍ବର: ବ୍ରାଉନସୁଗାର ବିକିବାକୁ ଆସି ଗାଁରେ ଧରାପଡି ବନ୍ଧା ହେଲେ ଦୁଇ ଯୁବକ । ଜିଲ୍ଲା ସଦର ବ୍ଲକ ଛାନୁଆରେ ଦୁଇ ଜଣ ଯୁବକ 4 ରୁ 5ଟି ପୁଡ଼ିଆ ବ୍ରାଉନସୁଗର ନେଇ ବିକ୍ରି କରିବାକୁ ଆସିଥିଲେ । କୌଣସି ସୂତ୍ରରୁ ଗ୍ରାମବାସୀ ଖବର ପାଇ ଉଭୟଙ୍କୁ କାବୁ କରିଥିଲେ । ପରେ ସେମାନଙ୍କ ନିକଟରୁ ବ୍ରାଉନସୁଗର ଜବତ କରିବା ସହ ଦୁହିଁଙ୍କୁ ଗଛରେ ବାନ୍ଧି ଦେଇଥିଲେ ।

ଖବରମୁତାବକ, ଯୁବକ 2 ଜଣ ହେଉଛନ୍ତି ଦିନେଶ ମହାନ୍ତି ଓ ତପନ ଭୂୟାଁ । ଗାଁ ଲୋକେ ଯୁବକ ଦ୍ବୟଙ୍କୁ ଅଟକ ରଖିବା ସହ ବସ୍ତା ଥାନାକୁ ଖବର ଦେଇଥିଲେ । କିନ୍ତୁ ଖବରପାଇବା ସତ୍ତ୍ବେ ବସ୍ତା ପୋଲିସ ବର୍ତ୍ତମାନ ସୁଦ୍ଧା ଘଟଣା ସ୍ଥଳରେ ପହଞ୍ଚି ନଥିବା ଜଣାପଡିଛି । ଯେଉଁଥିପାଇଁ ଲୋକଙ୍କ ମଧ୍ୟରେ ଅସନ୍ତୋଷ ଦେଖିବାକୁ ମିଳିଛି ।

ସେହିଭଳି କିଛିଦିନ ପୂର୍ବେ ଉକ୍ତ ଗାଁରୁ ଜଣେ ଯୁବକ ବ୍ରାଉନସୁଗାର କିଣି ନେଉଥିବାବେଳେ ଏକ ଛୋଟ ପିଲା ବେକରୁ ସୁନା ଲକେଟ ଝାମ୍ପି ନେଇଥିଲା । ଉକ୍ତ ଯୁବକକୁ ଗ୍ରାମବାସୀ ମାନେ କାବୁ କରିବା ସହ ନିସ୍ତୁକ ପିଟିଥିଲେ । ପରେ ପୋଲିସର ଜିମା ଦେଇଥିଲେ ।

ପୁନର୍ବାର ଗାଁରେ ଏମିତି ବ୍ରାଉନସୁଗର କାରବାରକୁ ନେଇ ଗ୍ରାମବାସୀଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖିବାକୁ ମିଳିଛି । ଏହି ଘଟଣାରେ ଅବକାରୀ ଓ ପୋଲିସ ବିଭାଗ ଦୃଷ୍ଟି ଦେବାକୁ ଗ୍ରାମବୀସୀ ମାନେ ଦାବି କରିଛନ୍ତି ।

ବାଲେଶ୍ବରରୁ ଜୀବନଜ୍ୟୋତି ନାୟକ, ଇଟିଭି ଭାରତ