ବାଲେଶ୍ବର: ବାଲେଶ୍ଵର ସଦର ଉପନିର୍ବାଚନ ପାଇଁ ମନୋନୀତ ବିଜେଡି ପ୍ରାର୍ଥୀଙ୍କୁ ନେଇ ଯେଉଁଭଳି ଅସନ୍ତୋଷ ଦେଖିବାକୁ ମିଳିଥିଲା, ତାହା ବିଜେଡିର ଭିତିରି କନ୍ଦଳକୁ ବି ପଦାରେ ପକାଇଦେଇଥିଲା । ଏନେଇ ଜିଲ୍ଲା ସଭାପତି ରବୀନ୍ଦ୍ର ଜେନା ଅବଶ୍ୟ କର୍ମୀମାନଙ୍କୁ ବୁଝାଇବାକୁ ଚେଷ୍ଟା କରି ଶେଷରେ ଦଳୀୟ ନିଷ୍ପତ୍ତିକୁ ମାନି ନେବାକୁ ଆହ୍ୱାନ ଦେଇଥିଲେ ସୁଦ୍ଧା କିଛି ମାତ୍ରାରେ ଅସନ୍ତୋଷ ଏବେ ବି ଦଳ ଭିତରେ ରହିଥିବା ଅନୁମାନ କରାଯାଉଛି । ଦଳ ଭିତରେ କୌଣସି ଅସନ୍ତୋଷ ନାହିଁ କିମ୍ବା ସୋସିଆଲ ମିଡିଆରେ ଦଳ ବିରୋଧରେ ହେଉଥିବା ଅପପ୍ରଚାର ସମ୍ପୂର୍ଣ୍ଣ ଅସଙ୍ଗତ ବୋଲି ଆୟୋଜିତ ସାମ୍ବାଦିକ ସମ୍ମିଳନୀରେ ଜିଲ୍ଲା ସଭାପତି ରବୀନ୍ଦ୍ର ଜେନା ଓ ମନ୍ତ୍ରୀ ତଥା ବାଲେଶ୍ଵର ପର୍ଯ୍ୟବେକ୍ଷକ ପ୍ରତାପ ଜେନା ସ୍ପଷ୍ଟୀକରଣ ଦେଇଛନ୍ତି ।
ଅବଶ୍ୟ ପ୍ରଥମରୁ ଦଳ ଚୟନ କରିଥିବା ପ୍ରାର୍ଥୀଙ୍କୁ ନେଇ କର୍ମୀ ମହଲରେ ଅସନ୍ତୋଷ ଦେଖିବାକୁ ମିଳିଥିଲା, ମାତ୍ର ତାହା ଏବେ ନାହିଁ ବୋଲି ସ୍ପଷ୍ଟ କରାଯାଇଛି । ଏହାସହ ବାକି କିଛି କର୍ମୀ ଏବେ ବି କ୍ଷୁବ୍ଧ ଥିବା ମଧ୍ୟ କୁହାଯାଇଛି । ଏ ସମସ୍ତ ଦିଗ ଉପରେ ଦଳର ବରିଷ୍ଠ ନେତାମାନେ ଧ୍ୟାନ ଦେବାସହ କର୍ମୀମାନଙ୍କୁ ମଧ୍ୟ ସନ୍ତୁଷ୍ଟ କରାଇବା ପାଇଁ ଚେଷ୍ଟା ଚଳାଇଥିବା ସୂଚନା ଦିଆଯାଇଛି ।