ବାଲେଶ୍ବର: ପୁଅର ଭୁଲ ପାଇଁ ମୃତ ବାପାକୁ ମିଳିଲାନି ଗାଁ ଲୋକଙ୍କ କାନ୍ଧ । କେବଳ କାନ୍ଧ ନୁହେଁ, ଗାଁ ମଶାଣିରେ ମଧ୍ୟ ସତ୍କାର କରିବାକୁ ଅନୁମତି ଦେଇ ନଥିଲେ ଗ୍ରାମବାସୀ । ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି ବାଲେଶ୍ବର ଜିଲ୍ଲା ଜଳେଶ୍ବର ବ୍ଲକ ଅଧିନସ୍ଥ ଆମ୍ବିଳିଅଠା ଗ୍ରାମରେ ।
ସୂଚନା ଅନୁସାରେ, ଉପରୋକ୍ତ ଗ୍ରାମର ଭୂପତି ଜେନାଙ୍କ ଦେହାନ୍ତ ପରେ ଗ୍ରାମବାସୀ ଶବ ସତ୍କାରରେ ସହଯୋଗ କରି ନଥିଲେ କି, ଗାଁ ମଶାଣିରେ ମଧ୍ୟ ଶବ ସତ୍କାର କରିବାକୁ ଅନୁମତି ଦେଇ ନଥିଲେ ।
ତେବେ ଭୂପତିଙ୍କ ପୁଅ ଓ ଗ୍ରାମବାସୀଙ୍କ ମଧ୍ୟରେ ପୂର୍ବରୁ କୌଣସି ଏକ ଗଣ୍ଡଗୋଳ ହୋଇଥିଲା । ଏହି କାରଣରୁ ବାପାର ଶବ ସତ୍କାର ପାଇଁ ପୁଅ ଗାଁ ମଶାଣିକୁ ନେବାବେଳେ ଗ୍ରାମବାସୀ ଏହାକୁ ବିରୋଧ କରିଥିବା ଅଭିଯୋଗ ହୋଇଛି ।
ଏହାକୁ ନେଇ ପୁଅ ଥାନାରେ ଦ୍ବାରସ୍ଥ ହୋଇଥିବା ଜଣାପଡିଛି । ଗ୍ରାମବାସୀଙ୍କ ବିରୋଧ ପରେ ପୁଅ ବାପାର ଶବକୁ 15 କିମି ଦୂର ରାଜଘାଟ ସୁବର୍ଣ୍ଣରେଖା ନଦୀକୂଳରେ ସତ୍କାର କରିଥିବା ଜଣାପଡ଼ିଛି । ବାପାର ଶବ ସତ୍କାର ପାଇଁ ଗ୍ରାମବାସୀଙ୍କୁ ପୁଅ ଡାକି ଥିବାବେଳେ କେହିବି ଏଥିରେ ସହଯୋଗ କରି ନଥିଲେ। ଅନ୍ୟପଟେ ଘଟଣାରେ ପୋଲିସ ତଦନ୍ତ ଆରମ୍ଭ କରିଛି।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ