ବାଲେଶ୍ବର: ବଞ୍ଚିବା ପାଇଁ ରାହା ଖୋଜୁଛି 5 ବର୍ଷର ଶିଶୁ । ଖେଳକୁଦ ବୟସରେ ଅସହ୍ୟ ଯନ୍ତ୍ରଣା । ନା ଜୀଇଁ ହଉଛି ନା ସହି ହଉଛି । ବଞ୍ଚିବା ପାଇଁ ନିଇତି ସଂଘର୍ଷ କରୁଛି ବାଲେଶ୍ବରର ଏହି କୋମଳମତି ଶିଶୁ ମୁଜିବୁର୍ । ଦୁନିଆ କଣ ଜାଣିବା ପୂର୍ବରୁ କର୍କଟର ଶିକାର ହୋଇଛି ସେ । ଦାରିଦ୍ର୍ୟରେ ଯୁଝି ହେଉଥିବା ପରିବାର ପୁଅର ଚିକିତ୍ସା କରିପାରୁ ନାହାନ୍ତି । ଅର୍ଥ ସାଜିଛି ବାଧକ ।
ବର୍ତ୍ତମାନ ସୁଦ୍ଧା ମୁଯିବୁର ପାଇଁ ଧାର କରଜ କରି ସାଢେ 3 ଲକ୍ଷ ଖର୍ଚ୍ଚ କରି ସାରିଲେଣି ପରିବାର ଲୋକେ । ଶେଷରେ କିଛି ଉପାୟ ନପାଇ ଜିଲ୍ଲାପାଳଙ୍କ ପାଖରେ ପହଞ୍ଚିଥିଲେ ମୁଯିବୁରର ମାତା-ପିତା । ଏହାସହ ସଦର ବିଧାୟକ ସ୍ବରୂପ ଦାସ ମଧ୍ୟ ଆସି ପହଞ୍ଚି ସମସ୍ତ ପ୍ରକାର ସହାୟତା ଯୋଗାଇ ଦିଆଯିବ ବୋଲି ପ୍ରତିଶୃତି ଦେଇଛନ୍ତି । ତେବେ କଅଁଳ ବୟସରେ କର୍କଟ ଯନ୍ତ୍ରଣା, ସହାୟତା ପ୍ରତିଶୃତି ମିଳିଥିଲେ ବି ନିଷ୍କପଟ ଆଖି ଖୋଜୁଛି ବଞ୍ଚିବାର ରାହା । ଯଦି କୌଣସି ସହୃଦୟ ବ୍ୟକ୍ତି ଶିଶୁଟିକୁ ସାହାଯ୍ୟ କରନ୍ତେ ତେବେ ହଜିଯାଇଥିବା ହସ ପୁଣି ଫେରି ଆସନ୍ତା ।
ବାଲେଶ୍ବରରୁ ଜୀବନଜ୍ୟୋତି ନାୟକ, ଇଟିଭି ଭାରତ