ବଲାଙ୍ଗୀର: ଖାକିରେ ଲାଗିଲା ଦାଗ । ଲାଞ୍ଚ ନେବାବେଳେ ଭିଜିଲାନ୍ସ ହାତରେ ଧରା ପଡିଲେ ପୋଲିସ ବାବୁ। ବଲାଙ୍ଗୀର ମୁରିବାହାଲ ଥାନାର ଏସଆଇ ସରୋଜ ରଞ୍ଜନ ରଥ ବୁଧବାର ଏହି ମାମଲାରେ ଗିରଫ ହୋଇଛନ୍ତି। ଭିଜିଲାନ୍ସ ବିଭାଗ, ମୁରିବାହାଲ ଥାନା ମିଳିତ ଭାବେ ଏସଆଇଙ୍କ ବଲାଙ୍ଗୀରସ୍ଥିତ ବେରେକ ଓ ଭବାନୀପାଟଣାସ୍ଥିତ ବାସଭବନରେ ଏକ କାଳୀନ ଚଢ଼ାଉ କରିଥିଲେ ।
ସୂଚନା ଅନୁସାରେ ମୁରିବାହାଲ ନିବାସୀ ସଞ୍ଜୀବ ପ୍ରଧାନଙ୍କ ସାନ ଭାଇ ନାଁରେ ଏହି ଥାନାରେ ଏକ ମାମଲା ଥିଲା । ତେବେ ଏହି ମାମଲାର ଚାର୍ଜସିଟ କୋହଳ କରିବା ପାଇଁ ଏସଆଇ 10 ହଜାର ଟଙ୍କା ଲାଞ୍ଚ ମାଗିଥିଲେ। ସେପଟେ ପୀଡିତ ଜଣକ ଏହାର ଅଭିଯୋଗ ବଲାଙ୍ଗୀର ଭିଜିଲାନ୍ସ ପାଖରେ କରିବା ପରେ ସମ୍ବଲପୁର ଭିଜିଲାନ୍ସ ଏସପିଙ୍କ ନିର୍ଦ୍ଦେଶ କ୍ରମେ ଆଜି ବଲାଙ୍ଗୀର ବରଗଡ଼ ଓ ସମ୍ବଲପୁର ଭିଜିଲାନ୍ସ ବିଭାଗ ଟଙ୍କା ଲାଞ୍ଚ ନେଉଥିବାବେଳେ ଏସଆଇ ସରୋଜ ରଞ୍ଜନ ରଥଙ୍କୁ ଧରିଥିଲେ।