ବଲାଙ୍ଗୀର: ଜିଲ୍ଲାର କଣ୍ଟାବାଞ୍ଜି ଥାନା ଲାଲଝରା ଅଞ୍ଚଳରେ ଜଣେ ମହିଳାଙ୍କ ସନ୍ଦେହଜନକ ମୃତ୍ୟୁ ହୋଇଥିବାବେଳେ ହତ୍ୟା ଅଭିଯୋଗ କରିଛନ୍ତି ମହିଳାଙ୍କ ପରିବାର । ମୃତଦେହ ଜବତ କରି ତଦନ୍ତ ଆରମ୍ଭ କରିଛି କଣ୍ଟାବାଞ୍ଜି ପୋଲିସ ।
ମହିଳାଙ୍କ ସନ୍ଦେହଜନକ ମୃତ୍ୟୁ ସୂଚନା ଅନୁସାରେ କଣ୍ଟାବାଞ୍ଜି ଥାନା ଲାଲଝରା ଗ୍ରାମରେ ଜଣେ ବିବାହିତା ମହିଳାଙ୍କ ସନ୍ଦେହ ଜନକ ମୃତ୍ୟୁ ହୋଇଛି । ଯାହାକୁ ମହିଳାଙ୍କ ପରିବାର ହତ୍ୟା ବୋଲି ଦର୍ଶାଇ କଣ୍ଟାବାଞ୍ଜି ଥାନାରେ ଅଭିଯୋଗ କରିଛନ୍ତି । ଅଭିଯୋଗକୁ ଆଧାର କରି ଲାଲଝରା ଗାଁକୁ ଯାଇ ମୃତ ମହିଳାଙ୍କ ସ୍ବାମୀ ତଥା ଆଖପାଖ ଅଞ୍ଚଳର ଲୋକଙ୍କୁ ପଚରା ଉଚରା କରିଛି ପୋଲିସ । ଏହାସହ ମୃତଦେହ ଜବତ କରି ଅଧିକ ତନାଘନା ଆରମ୍ଭ କରିଛି ।
ଅଭିଯୋଗ ଅନୁସାରେ ବେଲପଡା ଥାନା ମୁନାପାଲି ଗାଁର ପରମା ଛତ୍ରିଆଙ୍କ ଝିଅ ଗୋମତୀଙ୍କୁ ଲାଲଝରା ଗାଁର ଦିବାକର ମାଝୀ ଗତବର୍ଷ ପ୍ରେମ ବିବାହ କରିଥିଲେ । ଗୋମତି ଦିବାକରଙ୍କ 45 ଦିନର ଏକ ଶିଶୁ କନ୍ୟା ମଧ୍ୟ ଅଛି । ଶୁକ୍ରବାର ରାତିରେ ଗୋମତି ତାଙ୍କ ପରିବାରକୁ ଫୋନ କରି ସବୁ ଭଲ ଅଛି ବୋଲି ମଧ୍ୟ କହିଥିଲେ । ଶନିବାର ସକାଳୁ ଗୋମତିର ଦେହ ଅସୁସ୍ଥ ଅଛି ବୋଲି ତାଙ୍କ ସ୍ବାମୀ ଫୋନ କରି ଗୋମତିଙ୍କ ପରିବାରକୁ ଜଣାଇଥିଲେ । ଏହାପରେ ପୁଣି ଫୋନକରି ଗୋମତିଙ୍କ ମୃତ୍ୟୁ ହୋଇଥିବା ଖବର କରିଥିଲେ ।
ତେବେ ଗୋମତିଙ୍କ ପରିବାର ଲୋକେ ଆସିବାରୁ ସ୍ବାମୀ ଦିବାକର ତାଙ୍କ ସହ ଝଗଡା କରିବା ଆରମ୍ଭ କରିଥିଲେ । ଯାହାପରେ ପାରିବାରିକ କଳହକୁ ନେଇ ଗୋମତିଙ୍କୁ ହତ୍ୟା କରାଯାଥିବା ସନ୍ଦେହରେ ଅଭିଯୋଗ କରିଥିଲେ ତାଙ୍କ ପରିବାର ଲୋକେ । ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇବା ସହ ଅଧିକ ତଦନ୍ତ ଆରମ୍ଭ କରିଛି ।
ବଲାଙ୍ଗୀରରୁ ଶେଖ ମହମ୍ମଦ ୱାହିଦ, ଇଟିଭି ଭାରତ
