ବଲାଙ୍ଗୀର:ପଞ୍ଚାୟତ ନିର୍ବାଚନରେ ସରପଞ୍ଚ ପ୍ରାର୍ଥୀ ଭୋଟ କିଣି ଥିବା ଅଭିଯୋଗ । ୪ ଲକ୍ଷ ଟଙ୍କାରେ ଭୋଟ କିଣା ଯାଇଥିବା କହିଛନ୍ତି ଗ୍ରାମବାସୀ । ବଲାଙ୍ଗୀର ପୁଇନ୍ତଳା ବ୍ଲକ କଶ୍ରୁ ପାଲି ଗ୍ରାମର ସବୁ ଭୋଟ ୪ ଲକ୍ଷ ଟଙ୍କାରେ କିଣା ଯାଇଥିବାର ଅଭିଯୋଗ ହୋଇଛି । ପୂର୍ବରୁ ବିଲେଇସର୍ଡା ଗ୍ରାମରେ ସରପଞ୍ଚ ପଦବୀ 44 ଲକ୍ଷ ଟଙ୍କାରେ ନିଲାମ ହେବା ଚର୍ଚ୍ଚାକୁ ଆସିବା ପରେ ବର୍ତ୍ତମାନ ସରପଞ୍ଚ ପ୍ରାର୍ଥୀ ଭୋଟ କିଣିଥିବା ଜଣାପଡିଛି ।
ସୂଚନା ଅନୁଯାୟୀ, ସରପଞ୍ଚ ପ୍ରାର୍ଥୀ ସୁଶାନ୍ତ ଛତ୍ରିଆ ନିର୍ବାଚନରେ ଭୋଟ କିଣିବାକୁ ଯାଇ କାଶ୍ରୁ ପାଲି ଗ୍ରାମର ମନ୍ଦିର କମିଟିକୁ ୪ ଲକ୍ଷ ଟଙ୍କା ଦେଇଥିବା ପୂଜକ କହିଛନ୍ତି । ମନ୍ଦିରର ପୂଜକ ଚକ୍ରଧର ପଣ୍ଡା ଏକ ଭାଇରାଲ ଭିଡିଓରେ ଏହା ପ୍ରକାଶ କରିଛନ୍ତି । ପୂର୍ବରୁ ନିଲାମ ଜିତିଥିବା ସରପଞ୍ଚ ପ୍ରାର୍ଥୀ ସୁଶାନ୍ତ ଛତ୍ରିଆଙ୍କ ନାଁରେ ଜିଲ୍ଲା ପ୍ରଶାସନ ତଦନ୍ତ କରି ଥାନାରେ ଅଭିଯୋଗ ଦେଇ ଥିବାବେଳେ ଏବେ ପୁଣି ଏହି ଘଟଣା ସାମ୍ନାକୁ ଆସିଛି । ତେବେ ନିର୍ବାଚନକୁ ଆଉ ଅଳ୍ପଦିନ ଥିବାବେଳେ ପ୍ରଶାସନ କି ପଦକ୍ଷେପ ନେଉଛି ତାହା ଦେଖିବାକୁ ବାକି ରହିଲା ।
ବଲାଙ୍ଗୀରରୁ ଶେଖ ମହମ୍ମଦ ୱାହିଦ, ଇଟିଭି ଭାରତ