ବଲାଙ୍ଗୀର:ବଲାଙ୍ଗୀର ସହରରେ ପୁଣି ଲୁଟେରାଙ୍କ ଆତଙ୍କ ରାଜ । ଘରେ ପଶି ଶ୍ଵଶୁର, ଝିଅ, ଜ୍ବାଇଁଙ୍କୁ ମରଣାନ୍ତକ ଆକ୍ରମଣ । ଲୁଟିନେଲେ ସୁନା ଅଳଙ୍କାର ଓ ଟଙ୍କା । ଦିନ ଦ୍ବିପହରରେ ଘରେ ପଶି ସମସ୍ତଙ୍କୁ ମରଣାନ୍ତକ ଆକ୍ରମଣ ସହ ସୁନା ଅଳଙ୍କାର ଓ ଟଙ୍କା ଲୁଟ ହୋଇଥିବାର ଅଭିଯୋଗ ହୋଇଛି । ଏଭଳି ଘଟଣା ଦେଖିବାକୁ ମିଳିଛି ବଲାଙ୍ଗୀର ଟାଉନ ଥାନା ଅନ୍ତର୍ଗତ ରାଜୀବ ନଗରରେ ।
ଦୁର୍ବୃତ୍ତଙ୍କ ଉନ୍ମୋତକାଣ୍ଡ : ଟଙ୍କା ନଦେବାରୁ ଝିଅ, ଜ୍ବାଇଁ ଓ ଶ୍ବଶୁରଙ୍କୁ ମରଣାନ୍ତକ ଆକ୍ରମଣ ଏଠାରେ ରହୁଥିବା ସର୍ବେଶ୍ଵର ସାହୁ ନିଜ ଘରେ ଥିବା ବେଳେ ଆରଟିଓ କାମରେ ଆସିଥିବା ଝିଅ ଜ୍ବାଇଁ ମଧ୍ୟ ତାଙ୍କ ସହ ଥିଲେ । ହେଲେ ବୁଧବାର ପାଞ୍ଚରୁ ଛଅ ଜଣ ଯୁବକ ଘରକୁ ଅତର୍କିତ ଭାବରେ ପଶି ଆସି ମାରଣାସ୍ତ୍ରରେ ସମସ୍ତଙ୍କୁ ଆକ୍ରମଣ କରିଥିଲେ । ଏହାସହ ସୁନା ଅଳଙ୍କାର ଓ ନଗଦ ଏକ ଲକ୍ଷରୁ ଅଧିକ ଟଙ୍କା ଲୁଟ କରି ଫେରାର ହୋଇ ଯାଇଥିବାର ଅଭିଯୋଗ ହୋଇଛି ।
ତେବେ ଏହି ଘଟଣାରେ ସର୍ବେଶ୍ଵର ସାହୁ ଗୁରୁତର ଆହତ ହୋଇଥିବା ବେଳେ ତାଙ୍କ ଝିଅ ଜ୍ବାଇଁ ମଧ୍ୟ ଆହତ ହୋଇଛନ୍ତି । ସେପଟେ ପାଖ ପଡୋଶୀ ସମସ୍ତଙ୍କୁ ଉଦ୍ଧାର କରି ବଲାଙ୍ଗୀର ଭୀମ ଭୋଇ ମେଡିକାଲରେ ଭର୍ତ୍ତି କରିଛନ୍ତି । ଅନ୍ୟପଟେ ବଲାଙ୍ଗୀର ଟାଉନ ପୋଲିସ ଏହାର ଅଭିଯୋଗ ପାଇବା ପରେ ତଦନ୍ତ ଆରମ୍ଭ କରିଛି । ଏ ସମ୍ପର୍କରେ ଆହତ ମହିଳା ପିଙ୍କି ପାଣିଗ୍ରାହୀ କହିଛନ୍ତି, ଆରଟିଓରେ ତାଙ୍କ ଗାଡ଼ି ରହିଛି । ଗାଡ଼ି ନେବା ପାଇଁ ଆରଟିଓ ଅଫିସ ଯିବାକୁ ବାହାରିଥିଲେ ପିଙ୍କି ଏବଂ ତାଙ୍କ ସ୍ବାମୀ । ସେହି ସମୟରେ ଘର ଭିତରକୁ ହଠାତ୍ 5 ଜଣ ଦୁର୍ବୃତ୍ତ ପଶି ଆସି ଟଙ୍କା ମାଗିଥିଲେ ।
ହେଲେ ଟଙ୍କା ଦେବୁନି ବୋଲି କହିବାରୁ ଆମ ଉପରେ ଅତର୍କିତ ଆକ୍ରମଣ କରିଥିଲେ । ତେବେ ଏହି ଅଭିଯୁକ୍ତଙ୍କ ଭିତରୁ ବ୍ରହ୍ମା, ଅବକାଶ ଓ ଦୀପକ ଦାସଙ୍କୁ ଆହତ ମହିଳା ଚିହ୍ନିଥିବା କହିଛନ୍ତି । ଏହି ସମସ୍ତ ଅଭିଯୁକ୍ତ ରାଜୀବ ନଗରର । ତେବେ ଆଉ ଦୁଇଜଣ ପରିଚୟ ମିଳିପାରିନି ।
ଇଟିଭି ଭାରତ,ବଲାଙ୍ଗୀର
