ବଲାଙ୍ଗୀର: ଧରାବତରଣ କରିବେ ଦୁର୍ଗତି ନାଶିନୀ ମା' ଦୁର୍ଗା । ଯାହାକୁ ନେଇ ଚଳଚଞ୍ଚଳ ହୋଇ ଉଠିଛି ବଲାଙ୍ଗୀର ସହର । ସବୁ ପୂଜା ମଣ୍ଡପର ପ୍ରସ୍ତୁତି ଚୂଡାନ୍ତରେ ପହଞ୍ଚିଛି । କାରିଗରମାନେ ମା'ଙ୍କ ମୂର୍ତ୍ତିକୁ ଶେଷ ସ୍ପର୍ଶ ଦେଉଛନ୍ତି । ସେହିପରି ପୂଜା କମିଟି ପକ୍ଷରୁ ତୋରଣ ସାଜସଜ୍ଜା ମଧ୍ୟ ଚୁଡାନ୍ତରେ ପହଞ୍ଚିଛି । ଅନେକ ପୂଜା କମିଟି ରାଜ୍ୟ ବାହାରୁ ଓ ଜିଲ୍ଲା ବାହାରୁ କାରିଗରମାନଙ୍କୁ ଆଣି ଉତ୍କୃଷ୍ଟ ସାଜ ସଜ୍ଜାରେ ଲାଗି ପଡିଛନ୍ତି।
ଆଲୋକ ସାଜସଜ୍ଜା ଠାରୁ ନେଇ ତୋରଣ ଓ ମଣ୍ଡପକୁ ଭଳିକି ଭଳି ଆଖି ଝଲସିଲା ଭଳି ସୁନ୍ଦର ରୂପରେ ଗଢିବାରେ ଲାଗିଛନ୍ତି । ତେବେ ଏଥର ବିନା କଟକଣାରେ ପୂଜା ହେବାକୁ ଥିବାବେଳେ ଉଭୟ ପୂଜା କମିଟି ଓ ଭକ୍ତ ମାନଙ୍କ ମଧ୍ୟରେ ବେଶ ଉତ୍ସାହ ଦେଖିବାକୁ ମିଳିଛି। ସେହିପରି ସବୁ ପୂଜା ମଣ୍ଡପ ରୀତିନୀତି ଅନୁସାରେ ମା'ଙ୍କ ପୂଜା ପାଇଁ ପ୍ରସ୍ତୁତି କରିଥିବା ବେଳେ ଭକ୍ତଙ୍କ ପାଇଁ ସାଂସ୍କୃତିକ କାର୍ଯ୍ୟକ୍ରମ ଓ ରାବଣ ପୋଡ଼ିର ଆୟୋଜନ କରାଯିବ । ବଲାଙ୍ଗୀରରେ ଚଳିତ ବର୍ଷ 21ଟି ପୂଜା ମଣ୍ଡପରେ ମା' ଦୁର୍ଗା ପୂଜା ପାଇବେ । ସହରର ରୁଗୁଡି ପଡ଼ା ଓ ଏବିଏସଏସ ପଡ଼ା ଦୁର୍ଗା ମନ୍ଦିରରେ ନବଦୁର୍ଗା ଓ ନବରାତ୍ର ପୂଜା ଅନୁଷ୍ଠିତ ହେବ।