ବଲାଙ୍ଗୀର: ବଲାଙ୍ଗୀର ଜିଲ୍ଲାର ଚୁକ୍ତି ଭିତ୍ତିକ ପ୍ରାଥମିକ ଶିକ୍ଷକ ଚାରି ଦଫା ଦାବି ନେଇ ରାଜରାସ୍ତାକୁ ଓହ୍ଲାଇଛନ୍ତି । ଏହାସହ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇ ବିକ୍ଷୋଭ ପ୍ରଦର୍ଶନ କରିଛନ୍ତି । ବିକ୍ଷୋଭରେ ଜିଲ୍ଲାର ଶତାଧିକ ପ୍ରାଥମିକ ଶିକ୍ଷକ ସାମିଲ ହୋଇଛନ୍ତି । ଗତ 15 ଅକ୍ଟୋବରରେ ରାଜ୍ୟ ସରକାର ଚୁକ୍ତି ଭିତ୍ତିକ ପଦବୀ ଉଚ୍ଛେଦ କରିଥିଲେ । ହେଲେ ଏଥିରେ କେବଳ 2013ରୁ ଚାକିରୀ କରୁଥିବା ପ୍ରତ୍ୟାଷି ପାଇଁ ଏହା ଲାଗୁ ହୋଇଛି । କିନ୍ତୁ 2013 ପୂର୍ବରୁ ଚୁକ୍ତି ଭିତ୍ତିକ ଭାବରେ ଚାକିରୀ କରୁଥିବା ପ୍ରାଥମିକ ଶିକ୍ଷକ ଏଥିରୁ ବଞ୍ଚିତ ହୋଇଛନ୍ତି । ତେଣୁ ଏମାନଙ୍କୁ ଏନପିଏସ ମାନ୍ୟତା ଦେଇ ସରକାର ନୂତନ ପେନସନ ଯୋଜନା ଏମାନଙ୍କ ପାଇଁ ଲାଗୁ କରିଛନ୍ତି ।
ଯାହାକୁ ଏମାନେ ଅଗ୍ରାହ୍ୟ କରିବା ସହ ପୁରୁଣା ପେନସନ ଲାଗୁ କରିବାକୁ ଦାବି କରିଛନ୍ତି । ସେହିପରି ଦରମା ବୃଦ୍ଧି ସହ ଅନ୍ୟାନ୍ୟ ଚାକିରୀ ସୁବିଧା ଦେବାକୁ ଏମାନେ ଦାବି କରିଛନ୍ତି । ସୂଚନା ଅନୁସାରେ ବଲାଙ୍ଗୀର ଜିଲ୍ଲାରେ 6ହଜାରରୁ ଊର୍ଦ୍ଧ୍ବ ପ୍ରାଥମିକ ଶିକ୍ଷକ ଅଛନ୍ତି । ସମସ୍ତେ ଚୁକ୍ତି ଭିତ୍ତିକ ଚାକିରୀ କରୁଛନ୍ତି । ତେଣୁ ଏମାନେ ଏହି ସବୁ ଚାରି ଗୋଟି ଦାବି ପୂରଣ ପାଇଁ ଆଗରୁ ବ୍ଲକସ୍ତରରେ ଆନ୍ଦୋଳନ କରିଛନ୍ତି । ଏହାସହ ମୁଖ୍ୟ ରାସ୍ତାକୁ ଅବରୋଧ କରିଛନ୍ତି । ତେଣୁ ଆଗାମୀ ଦିନରେ ତାଙ୍କର ଦାବି ପୂରଣ ନହେଲେ ଆଗକୁ ତୀବ୍ର ଆନ୍ଦୋଳନ କରିବେ ବୋଲି କହିଛନ୍ତି ।
ସୂଚନାନୁସାରେ ପ୍ରାଥମିକ ବିଦ୍ୟାଳୟଗୁଡିକରେ କାର୍ଯ୍ୟରତ ଚୁକ୍ତିଭିତ୍ତିକ ଠିକା ଶିକ୍ଷକମାନଙ୍କୁ ଅନ୍ୟ ଠିକା କର୍ମଚାରୀଙ୍କ ଭଳି ନିୟମିତ କରାଯାଇ ନାହିଁ । ଏହି ଶିକ୍ଷକ ଶିକ୍ଷୟତ୍ରୀମାନେ ବର୍ଷ ବର୍ଷ ଧରି ସ୍ୱଳ୍ପ ପାରିଶ୍ରମିକରେ କାମ କରୁଛନ୍ତି । ତେଣୁ ଅନ୍ୟ ଠିକା କର୍ମଚାରୀଙ୍କ ଭଳି ସେମାନଙ୍କୁ ମଧ୍ୟ ଚାକିରି ଆରମ୍ଭରୁ ନିୟମିତ କରିବା ସହ ଇନକ୍ରିମେଣ୍ଟ ଆଦି ଦେବାପାଇଁ ଦାବି କରିଛନ୍ତି ଚୁକ୍ତିଭିତ୍ତିକ ଠିକା ଶିକ୍ଷକ ।