ବଲାଙ୍ଗୀର: ଜିଲ୍ଲାରେ ମହିଳାଙ୍କ ପ୍ରତି ବଢ଼ୁଛି ହିଂସା । ଅନେକ ମାମଲାରେ ଏଯାଏଁ ପୋଲିସ ହାତ ଖାଲି ଥିବାବେଳେ କିଛି ମାମଲାରେ ମୃତ ମହିଳାଙ୍କ ପରିଚୟ ମଧ୍ୟ ଜାଣି ପାରୁନାହିଁ ପୋଲିସ । ସଇଁତଳା ଅଞ୍ଚଳରୁ ଉଦ୍ଧାର ହୋଇଥିବା ମହିଳାଙ୍କ କଙ୍କାଳ ସମ୍ପର୍କରେ ସୂଚନା ପାଇଁ ଦଶ ହଜାର ଟଙ୍କା ପୁରସ୍କାର ରାଶି(Cash Prize) ଘୋଷଣା କରାଯାଇଛି । ତେବେ ପୋଲିସର ଏଭଳି ଅପାରଗତାକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ଅସନ୍ତୋଷ ଦେଖିବାକୁ ମିଳିଛି ।
ବିଗତ କିଛି ବର୍ଷ ମଧ୍ୟରେ ସଇଁତଳା ଅଞ୍ଚଳରୁ ଅନେକ ମହିଳାଙ୍କ ମୃତଦେହ ମିଳିଛି । ଜୁଲାଇ ୨୦୧୫ରେ ବରଗାଁ ଛକରୁ ଜଣେ ଯୁବତୀଙ୍କ ଦରପୋଡ଼ା ମୃତଦେହ ଉଦ୍ଧାର ହୋଇଥିଲା । ଏହି ଘଟଣାକୁ ୭ ବର୍ଷ ବିତି ଥିବା ବେଳେ ପୋଲିସ ଏଯାଏଁ ମୃତ ଯୁବତୀଙ୍କର ପରିଚୟ ମଧ୍ୟ ଜାଣି ପାରି ନାହିଁ । ସେହିଭଳି ୨୦୨୧ରେ ବିବିନା ଛକରୁ ଜଣେ ମହିଳାଙ୍କ କଙ୍କାଳ(Woman Skeleton) ଉଦ୍ଧାର ହୋଇଥିଲା ।