ବଲାଙ୍ଗୀର: ଜିଲ୍ଲାରେ ଜଣେ ଅଣଓଡିଆ ନେତା ବଳରାମ ସିଂହ ଯାଦବଙ୍କୁ ନେଇ ଏବେ ଚର୍ଚ୍ଚା । ସେ ନିଜକୁ ବିଜେପି ନେତା କହି ସଂଗଠନ କରୁଥିବା ବେଳେ ବିଜେପିରେ ବିଦ୍ରୋହ ହେଉଥିବା ଭଳି ଅଭାଷ ମିଳିଛି । ଯାହାକୁ ନେଇ ଏବେ ଜିଲ୍ଲା ବିଜେପି ସଭାପତି ସାମ୍ନାକୁ ଆସି ତାଙ୍କର ପ୍ରତିକ୍ରିୟା ସ୍ପଷ୍ଟ କରିଛନ୍ତି । ସମ୍ପୃକ୍ତ ନେତା ବିଜେପିର କୌଣସି ସଦସ୍ୟ ନୁହନ୍ତି ଓ ସେ କରୁଥିବା ସଂଗଠନ ବେଆଇନ ବୋଲି କହିଛନ୍ତି ଜିଲ୍ଲା ବିଜେପି ସଭାପତି । ଆଗାମୀ ଦିନରେ ତାଙ୍କ ନାଁରେ ଫୌଜଦାରୀ ମାମଲା ଦିଆଯିବ ବୋଲି ସେ କହିଛନ୍ତି । ସେହିପରି ତାଙ୍କୁ ସହଯୋଗ କରୁଥିବା ଅନ୍ୟ ବିଜେପି ନେତାଙ୍କ ବିରୋଧରେ ମଧ୍ୟ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ହେବ ବୋଲି ସ୍ପଷ୍ଟ କରିଛନ୍ତି ଜିଲ୍ଲା ବିଜେପି ସଭାପତି ଶିବାଜୀ ମହାନ୍ତି ।
ନିର୍ବାଚନ ପାଖେଇ ଆସୁଥିବା ବେଳେ ବିଭିନ୍ନ ରାଜନୈତିକ ଦଳ ଓ ନେତା ନିଜର ପତିଆରା ଦେଖାଇବା ଆରମ୍ଭ କଲେଣି । ଏହାରି ମଧ୍ୟରେ ବଲାଙ୍ଗୀରରେ ୨-୩ ବର୍ଷ ହେବ ଜଣେ ଅଣଓଡିଆ ନେତା ନିଜକୁ ବିଜେପି ନେତା କହି ସଂଗଠନ କରି ଆସୁଛନ୍ତି । ଏପରିକି ନିକଟରେ ସେ ଏକ ଜିଲ୍ଲାସ୍ତରୀୟ ସଂଯୁକ୍ତ ମୋର୍ଚ୍ଚା ବୈଠକ କରିଥିଲେ । ଏହି ବୈଠକ ପରେ ବଲାଙ୍ଗୀର ରାଜାଘର କେନ୍ଦ୍ରିତ ବିଜେପିରେ ତାଙ୍କ ବିରୋଧରେ ବିଦ୍ରୋହ ହେଲାଭଳି ଅଭାଷ ମିଳିଥିଲା । ଏହି ଅଣ ଓଡିଆ ନେତା ବଳରାମ ସିଂହ ଯାଦବ ରାଜ୍ୟ ବିଜେପିର ନିର୍ଦ୍ଦେଶରେ ଏହି ବୈଠକ କରିଥିବା କହିଥିଲେ । ତେବେ ଏହି ବୈଠକରେ ବଲାଙ୍ଗୀର ଓ ସୋନପୁର ଜିଲ୍ଲାର ଶତାଧିକ କର୍ମୀ ଓ ନେତା ଅଂଶ ଗ୍ରହଣ କରିଥିଲେ । ହେଲେ ଏଠାରେ ସେ ବ୍ୟବହାର କରିଥିବା ବ୍ୟାନର ଓ ପୋଷ୍ଟରରେ ସ୍ଥାନୀୟ ନେତା କିମ୍ବା କେବି ସିଂହଦେଓ ତଥା ସଂଗୀତା ସିଂହଦେଓଙ୍କ ଫଟୋ ନଥିଲା । ସେହିପରି ରାଜାଘର କିମ୍ବା ଜିଲ୍ଲା ବିଜେପିର ସଭାପତି ଓ ଅନ୍ୟ ନେତାଙ୍କୁ ଡକା ଯାଇ ନଥିଲା । ଯେଉଁଥିରୁ ଏମାନେ ରାଜାଘର ବିରୋଧରେ ମେଳି କରୁଥିବାର ସ୍ପଷ୍ଟ ହୋଇଥିଲା ।
ସେପଟେ ଦିନକ ପରେ ବଲାଙ୍ଗୀର ଜିଲ୍ଲା ବିଜେପି ସଭାପତି ଶିବାଜୀ ମହାନ୍ତି ଏହା ଉପରେ ଗଣମାଧ୍ୟମରେ ନିଜର ପ୍ରତିକ୍ରିୟା ରଖିଛନ୍ତି । ସେ କହିଛନ୍ତି, "ଗଣମାଧ୍ୟମରୁ ମୁଁ ଜାଣିବାକୁ ପାଇଥିଲି ଯେ ବଲାଙ୍ଗୀର ଶାନ୍ତିପଡ଼ାରେ ଏହି ବୈଠକ ବସିଥିଲା । ଏହାର ଆୟୋଜନ କରିଥିବା ଅଣଓଡ଼ିଆ ନେତା ବଳରାମ ସିଂହ ଯାଦବ ବିଜେପିର କୌଣସି ସଦସ୍ୟ ନୁହନ୍ତି । ତାଙ୍କ ନାଁରେ ଅନେକ ଅପରାଧିକ ମାମଲା ଅନ୍ୟ ରାଜ୍ୟରେ ରହିଛି । ସେ ବିଜେପିର ସଦସ୍ୟ ନଥାଇ ମଧ୍ୟ ନିଜ ଗାଡ଼ିରେ ବିଜେପି ପତାକା ଲଗାଇ ନିଜକୁ ବିଜେପି ନେତା କହି ଦଳକୁ ବଦନାମ କରୁଛନ୍ତି । ଜିଲ୍ଲାରେ କୌଣସି କାର୍ଯ୍ୟକ୍ରମ ହେଲେ ଜିଲ୍ଲା ସଭାପତିଙ୍କୁ ରାଜ୍ୟ ସଭାପତି ଦାୟିତ୍ବ ଦେଇଥାନ୍ତି ।" ତେବେ ସେହି ବୈଠକର କୌଣସି ସ୍ବୀକୃତି ନାହିଁ ବୋଲି ସେ କହିଛନ୍ତି । ଏହା ସହିତ ତାଙ୍କର ଏଭଳି କାର୍ଯ୍ୟକଳାପ ପାଇଁ ଆଗାମୀ ଦିନରେ ବିଜେପି ପକ୍ଷ୍ୟରୁ ତାଙ୍କ ନାଁରେ ଫୌଜଦାରୀ ମାମଲା ରୁଜୁ କରାଯିବ ବୋଲି ମଧ୍ୟ କହିଛନ୍ତି ଜିଲ୍ଲା ବିଜେପି ସଭାପତି ଶିବାଜୀ ମହାନ୍ତି ।