ଅନୁଗୋଳ: ଏବେ ପାଣି ମାଗି ଚଳିବାକୁ ପଡୁଛି । ଯଦି ପଡୋଶୀ ପାଣି ନ ଦେଲେ ତେବେ କଥା ସରିଲା । ଦିନେ ଆଣିଲେ ଦୁଇରୁ ତିନି ଦିନ କେବଳ ଜୀବନ ବଞ୍ଚାଇବା ପାଇଁ ଚଳିବାକୁ ପଡୁଛି । ଏହି ଅସୁବିଧାର ସ୍ଥାୟୀ ସମାଧାନ ପାଇଁ ପାନୀୟ ଜଳ ପ୍ରକଳ୍ପ ହୋଇଛି । ପାଞ୍ଚ ବର୍ଷ ହେବ ପାଇପ ପଡିଛି ହେଲେ ତାହା କାମରେ ଲାଗୁନି । ଏଭଳି ଅବ୍ୟବସ୍ଥା କୌଣସି ଉପାନ୍ତ ଅଞ୍ଚଳର ନୁହେଁ ବରଂ ଜିଲ୍ଲା ପ୍ରଶାସନର ନାକ ତଳେ ।
ଭିଡିଓ ସୌଜନ୍ୟ- ସମ୍ବାଦଦାତା, ଅନୁଗୋଳ
ଅନୁଗୋଳ ଜିଲ୍ଲା ଅନୁଗୋଳ ବ୍ଲକ ଖଲାରି ପଞ୍ଚାୟତର ଦୃଶ୍ୟ । ପଞ୍ଚାୟତ ଲାଗିଛି ସହରକୁ, ଅର୍ଥାତ ଜିଲ୍ଲା ସଦର ମହକୁମାକୁ ଲାଗିଛି ଏହି ଗାଁ । ହେଲେ ଏଠାରେ ପାଣି ପାଇଁ ହାହାକାର । ପାଞ୍ଚ ବର୍ଷ ହେବ ପାଇପ ପଡିସାରିଛି। ହେଲେ ପାଇପରେ ପାନୀୟ ଜଳ ଆସିବ ବୋଲି କହି ଦିନ ଗଡାଇ ଚାଲିଛି ବିଭାଗ । କହିବାକୁ ଗଲେ ବ୍ୟବସ୍ଥା ଥାଇ ବି ଶୋଷରେ ଛଟପଟ ଲୋକେ । ଯେଉଁ ଗୋଟିଏ ସରକାରୀ ନଳକୂପ ଅଛି ତା ପାଖରେ ଲାଗୁଛି ଲମ୍ବା ଲାଇନ ।