ଅନୁଗୋଳ: ନାଲକୋରୁ ପୂର୍ବରୁ ଟ୍ରକ୍ ଯୋଗେ ଆଲୁମିନିୟମ ପରିବହନ କରାଯାଉଥିବା ବେଳେ ବର୍ତ୍ତମାନ ଏହାକୁ ଟ୍ରେନ ଯୋଗେ କରାଯାଉଛି । ଯାହାକୁ ନେଇ ଟ୍ରକ୍ ମାଲିକଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି । ଏହାକୁ ବିରୋଧ କରି ଟ୍ରକ ମାଲିକ ସଂଘ ନାଲକୋ ବିରୁଦ୍ଧରେ ଅସହଯୋଗ ଆନ୍ଦୋଳନର ଡାକରା ଦେଇଛି ।
ଟ୍ରକ୍ ଯୋଗେ ଆଲୁମିନିୟମ ପରିବହନ ବନ୍ଦ ହେବା ଦ୍ବାରା ଟ୍ରକ୍ ମାଲିକମାନେ ବିଶେଷ ଭାବରେ ପ୍ରଭାବିତ ହୋଇଛନ୍ତି । ଟ୍ରକରେ ଆଲୁମିନିୟମ ପରିବହନ କରି ସେମାନେ ନିଜେ ରୋଜଗାର କରିବା ସହ ପ୍ରତ୍ୟକ୍ଷ ଓ ପରୋକ୍ଷରେ ଅନେକ ନିଯୁକ୍ତି ସୁଯୋଗ ସୃଷ୍ଟି କରିଥିଲେ । କିନ୍ତୁ ଗତ ମାସଠାରୁ ନାଲକୋର ଆଲୁମିନିୟମ ପରିବହନ ଟ୍ରକରେ ନ କରାଯାଇ ଟ୍ରେନରେ କରାଯାଉଛି । ଯାହାଦ୍ବାରା ଏବେ ଜିଲ୍ଲାର ପ୍ରାୟ ତିନି ହଜାର ଟ୍ରକ ଆଉ ଗଡୁ ନଥିବା ବେଳେ ଏହା ଉପରେ ନିର୍ଭର କରୁଥିବା 30 ହଜାର ପରିବାର ମଧ୍ୟ ପ୍ରଭାବିତ ହୋଇଛନ୍ତି ।