ଅନୁଗୋଳ: କେନ୍ଦ୍ର ସରକାରଙ୍କ ରାଷ୍ଟ୍ରାୟତ ଉଦ୍ୟୋଗରୁ ପୁଞ୍ଜି ପ୍ରତ୍ୟାହାର ନିଷ୍ପତ୍ତିକୁ ବିରୋଧ । ସପ୍ତାହେ ବ୍ୟାପୀ ଆନ୍ଦୋଳନ କରିବ ଭାରତୀୟ ମଜଦୁର ସଂଘ (ବିଏମଏସ୍) । କେନ୍ଦ୍ର ସରକାର ରାଷ୍ଟ୍ରାୟତ ଉଦ୍ୟୋଗରୁ ପୁଞ୍ଜି ପ୍ରତ୍ୟାହାର କରିବାକୁ ନିଷ୍ପତ୍ତି ନେଉଛନ୍ତି, ଯାହା ଶ୍ରମିକ ବିରୋଧୀ ବୋଲି ଅଭିଯୋଗ ଆଣିଛି ବିଏମଏସ୍ ।
‘ସେଭ୍ ପିଏସୟୁ, ସେଭ ନେସନ୍’ ନାରା ଦେଇ ଭାରତୀୟ ମଜଦୁର ସଂଘ ଆନ୍ଦୋଳନକୁ ଓହ୍ଲାଇଛି । ସଂଘ ଅଭିଯୋଗ କରିଛି ଯେ, ଦେଶରେ ବେରୋଜଗାରୀ ବଢିଚାଲିଛି । ଏଭଳି ପରିସ୍ଥିତିରେ ପୁଞ୍ଜି ପ୍ରତ୍ୟାହାର କରାହେଲେ ରାଷ୍ଟ୍ରାୟତ୍ତ ଉଦ୍ୟୋଗ ଘରୋଇ ମାଲିକାନା ଅଧିନକୁ ଚାଲିଯିବ । ଆଉ ଏଠାରେ କାମ କରୁଥିବା ଶ୍ରମିକ ନିଜର ଜୀବିକା ହରାଇବେ।
ସରକାରୀ ଉଦ୍ୟୋଗରୁ ପୁଞ୍ଜି ପ୍ରତ୍ୟାହାର ହେଲେ ଶ୍ରମିକ ଓ କର୍ମଚାରୀଙ୍କ ନିଯୁକ୍ତି ବିପଦକୁ ଚାଲିଯିବ। କେନ୍ଦ୍ର ସରକାର ଏହି ନିଷ୍ପତ୍ତି ବଦଳାନ୍ତୁ ବୋଲ ସଙ୍ଗଠନ ଦାବି କରିଛି। ଦେଶରେ ଯେବେବି ଆର୍ଥିକ ସଙ୍କଟ ଦେଖା ଦେଇଛି ସେତେବେଳେ ରାଷ୍ଟ୍ରାୟତ୍ତ ଉଦ୍ୟୋଗ ସମୂହ ନିଜର ଜମା ପୁଞ୍ଜି ସରକାରଙ୍କୁ ଦେଇଛନ୍ତି । ହେଲେ ଆଜି ସରକାର ବିଦେଶୀ କମ୍ପାନୀ ହାତରେ ତାହାକୁ ବିକିବାକୁ ବସିଛନ୍ତି ।
ଭିଡିଓ ସୌଜନ୍ୟ: ସମ୍ବାଦଦାତା, ଅନୁଗୋଳ ଏହା ବିରୋଧରେ ବିଏମଏସ୍ ୨ ତାରିଖରୁ ୯ ତାରିଖ ପର୍ଯ୍ୟନ୍ତ ସପ୍ତାହେ ବ୍ୟାପୀ ଆନ୍ଦୋଳନ କରିବ ବୋଲି ସଂଘ ପକ୍ଷରୁ ଏକ ସାମ୍ବାଦିକ ସମ୍ମିଳନୀରେ କୁହାଯାଇଛି । ଏହି ଆନ୍ଦୋଳନରେ ବିଏମଏସ୍ ସହିତ ଅନ୍ୟ ଶ୍ରମିକ ସଙ୍ଗଠନ ମଧ୍ୟ ସାମିଲ ରହିବେ ବୋଲି ସାମ୍ବାଦିକ ସମ୍ମିଳନୀରେ ଶ୍ରମିକ ନେତା ଜଣାଇଛନ୍ତି।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ