ଅନୁଗୋଳ: ଲଗାଣ ବର୍ଷା ବିତ୍ପାତରେ କାହାର ସର୍ବନାଶ ତ ଆଉ କାହାର ପୁଷ ମାସ । ଆଜି ଏଭଳି କିଛି ଘଟଣା ସାମ୍ନାକୁ ଆସିଛି ଅନୁଗୋଳ ଜିଲ୍ଲାରେ। ବର୍ଷାର ବିତ୍ପାତ ଅନେକଙ୍କୁ ଦୁଃଖ ଦେଇଯାଇଛି। କାହାର ଫସଲ ଉଜୁଡି ଯାଇଛି ତ କାହାର ଘର ଭାଙ୍ଗି ଯାଇଛି। ହେଲେ ଏହାର ଏକ ଭିନ୍ନ ଚିତ୍ର ଦେଖିବାକୁ ମିଳିଛି ଅନୁଗୋଳ ଜିଲ୍ଲାରେ । ବର୍ଷା ଛାଡିବା ପରେ ଲୋକେ ନାଳରେ ଏକତ୍ରିତ ହୋଇ ମାଛ ଧରୁଥିବା ଦେଖିବାକୁ ମିଳିଛି ।
ଜିଲ୍ଲାର ଛେଳିଆପଡା ନିକଟରେ ବହି ଯାଇଥିବା ଲିଙ୍ଗିରା ନାଳରେ ଶହଶହ ଲୋକେ ଜାଲ ସାହଯ୍ୟରେ ମାଛ ଧରୁଥିବା ଚିତ୍ର ସାମ୍ନାକୁ ଆସିଛି । ଗତକାଲି ନାଳରେ ପ୍ରବଳ ବର୍ଷା ଜଳ ପ୍ରବାହିତ ହୋଇଥିଲା । ଆଜି ଜଳସ୍ତର କମିବା ପରେ ଲୋକେ ମାଛ ଧରିବାରେ ଲାଗି ପଡିଥିଲେ । କୋଭିଡ କଟକଣାକୁ ଅଣଦେଖା କରି ପୁରୁଷ ମହିଳା, ଛୁଆ ଠାରୁ ଆରମ୍ଭ କରି ବୃଦ୍ଧ, ସମସ୍ତେ ନାଳରେ ମାଛ ଧରୁଥିବା ନଜର ଆସିଥିଲେ । ରାଜ୍ୟରେ ଲଗାଣା ବର୍ଷାରେ ବେହାଲ ସ୍ଥିତି ସୃଷ୍ଟି ହୋଇଥିବାବେଳେ ଏପରି ସମୂହ ମାଛଧରାର ଚିତ୍ର କାହାର ପୁଷ ମାସ ତ କାହାର ସର୍ବନାଶ ଉକ୍ତିକୁ ଯଥାର୍ଥ ପ୍ରମାଣିତ କରିଛି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ