ଅଜଣା ଗାଡି ଧକ୍କାରେ ଇଞ୍ଜିନିୟରିଂ ଛାତ୍ରୀ ମୃତ

ସଡକ ଦୁର୍ଘଟଣାରେ ପ୍ରାଣ ହରାଇଛନ୍ତି ଇଞ୍ଜିନିୟରିଂ ଛାତ୍ରୀ । ଶୁକ୍ରବାର ସକାଳେ ଏକ ଅଜଣା ଗାଡି ଧକ୍କାରେ ଛାତ୍ରୀଙ୍କ ମୃତ୍ୟୁ ହୋଇଥିବା ସୂଚନା ।

ଅନୁଗୋଳ: ବେପରୁଆ ଗାଡି ଚାଳନାର କରୁଣ ପରିଣତି । ସଡକ ଦୁର୍ଘଟଣାରେ ପ୍ରାଣ ହରାଇଛନ୍ତି ଇଞ୍ଜିନିୟରିଂ ଛାତ୍ରୀ । ଶୁକ୍ରବାର ସକାଳେ ଏକ ଅଜଣା ଗାଡି ଧକ୍କାରେ ଛାତ୍ରୀଙ୍କ ମୃତ୍ୟୁ ହୋଇଥିବା ସୂଚନା । ତାଳଚେର ଗୁରୁଜାଙ୍ଗୁଲି ବ୍ରିଜ ଉପରେ ଦୁର୍ଘଟଣା ଘଟିଥିବା ବେଳେ ଛାତ୍ରୀଙ୍କ ମଉସା ଗୁରୁତର ଅବସ୍ଥାରେ ଡାକ୍ତରଖାନାକୁ ସ୍ଥାନାନ୍ତର ହୋଇଛନ୍ତି ।

ମୃତ ଛାତ୍ରୀ ଜଣଙ୍କ ଭୁବନେଶ୍ବରର ହୋଇଥିବା ସୂଚନା । ସେ ସରାଙ୍ଗ ଇଞ୍ଜିନିୟରିଂ କଲେଜରେ ପଢୁଥିବା ବେଳେ ଶୁକ୍ରବାର ସକାଳେ ମଉସାଙ୍କ ସହ ସ୍କୁଟି ଯୋଗେ ଥର୍ମାଲ ଷ୍ଟେସନ ଯାଉଥିଲେ । ହେଲେ ବାଟରେ ଅଜଣା ଗାଡି ଧକ୍କାରେ ଛାତ୍ରୀଙ୍କର ଘଟଣାସ୍ଥଳରେ ହିଁ ମୃତ୍ୟୁ ହୋଇଛି ।

ଘଟଣାରେ ସ୍ଥାନୀୟ ଲୋକେ ଉତ୍ତ୍ୟକ୍ତ ହୋଇ ରାସ୍ତା ଅବରୋଧ କରିବା ସହ ବିକ୍ଷୋଭ ପ୍ରଦର୍ଶନ କରିଥିଲେ । ତେବେ ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ଲୋକଙ୍କୁ ବୁଝାସୁଝା କରିବା ସହ ଛାତ୍ରୀଙ୍କ ମୃତଦେହ ଜବତ କରିଛି ।

ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ