ଅନୁଗୋଳ:ମୌସୁମୀ ଆଗମନରେ ବିଲରେ ଧାନ ବୁଣିବାକୁ ଚାଷୀକୂଳ ତରତର । ଏଥିପାଇଁ ବିହନ ନିଗମ ପକ୍ଷରୁ ଚାଷୀଙ୍କୁ ବିଭିନ୍ନ କିସମର ବିହନ ଯୋଗାଇ ଦିଆଯାଇଥିଲା । ମାତ୍ର ସେହି ସରକାରୀ ବିହନ ଆଣି ଏବେ ଚିନ୍ତାରେ ଚାଷୀ । କାରଣ ବିହନ ସବୁ ବସ୍ତା ଭିତରେ ଗଜା ହୋଇଯାଇଛି । ଆଉ ସେହି ଗଜା ବିହନକୁ ଯିଏ ବୁଣୁଛି ସେଥିରୁ ଗଛ ହେଉନାହିଁ । ଚାଷୀଙ୍କ ଏଭଳି ଦୟନୀୟ ସ୍ଥିତି ଦେଖିବାକୁ ମିଳିଛି ଅନୁଗୋଳ ଜିଲ୍ଲା ବାରଗୌଣିଆ ପଞ୍ଚାୟତରେ ।
ଭିଡିଓ ସୌଜନ୍ୟ: ସମ୍ବାଦଦାତା, ଅନୁଗୋଳ
ଜିଲ୍ଲା ବିହନ ନିଗମରୁ ୨୨ କ୍ବିଣ୍ଟାଲ ପୂଜା କିଶମର ଧାନ ବିହନ ସହ ସ୍ଵର୍ଣ୍ଣ କିସନ ବିହନ ଏବଂ ଅନ୍ୟାନ୍ୟ କିସମର ୪୫ କ୍ବିଣ୍ଟାଲ ଧାନ କିଣିଥିଲା ଖାଲଗାଁ ସମବାୟ ସମିତି । ତନ୍ମଧ୍ୟରୁ କେବଳ ପୂଜା କିସମର ଧାନ ବିହନ ବସ୍ତା ଭିତରେ ଗଜା ହୋଇଥିବା ଅଭିଯୋଗ କରିଛନ୍ତି ଚାଷୀ । ସେପଟେ ଚାଷ ସମୟ ବିତିଯାଉଥିବାରୁ ଏବେ ଗଜା ବିହନକୁ ନେଇ କଣ କରିବେ ସେ ନେଇ ଚିନ୍ତାରେ ଚାଷୀକୂଳ । ଅନ୍ୟପଟେ ପୂଜା କିସମର ବିହନ ଗଜା ହେବା କଥାକୁ ଖୋଦ୍ ବିହନ ନିଗମର ଅଧିକାରୀ ମଧ୍ୟ ସ୍ବୀକାର କରିଛନ୍ତି ।