ଟୋକିଓ: ଭାରତୀୟ ଭାରୋତ୍ତୋଳନକାରୀ ମୀରାବାଇ ଚାନୁ ଟୋକିଓ ଅଲମ୍ପିକ୍ ମହିଳା 49 କିଲୋଗ୍ରାମ ଭାରୋତ୍ତୋଳନ ଇଭେଣ୍ଟରେ ଐତିହାସିକ ରୌପ୍ୟ ପଦକ ଜିତିଛନ୍ତି । ଏହି ସଫଳତା ପରେ ପ୍ରତି ଭାରତୀୟଙ୍କ ପାଖରୁ ତାଙ୍କୁ ନିକଟରୁ ଶୁଭେଚ୍ଛାର ସୁଅ ଛୁଟିଛି । ବିଶ୍ବର 3 ନମ୍ବର ସ୍ଥାନରେ ଥିବା ଭାରୋତ୍ତୋଳନକାରୀ ମୀରାବାଇ ସ୍ନେଚ୍ରେ 87 କିଲୋଗ୍ରାମ, କ୍ଳିନ ଓ ଜର୍କ 115 କିଲୋଗ୍ରାମ ସହ ମୋଟ 202 କିଲୋଗ୍ରାମ ଭାର ଉଠାଇଛନ୍ତି ।
ଏହି ଐତିହାସିକ ସଫଳତା ହାସଲ ପରେ ମୀରାବାଇ ଗଣମାଧ୍ୟମକୁ କହିଛନ୍ତି, "ମୁଁ ବହୁତ ଖୁସି କି, ପଦକ ଜିତିପାରିଛି । ସମଗ୍ର ଦେଶ ମୋତେ ଦେଖୁଛି ଓ ସମସ୍ତଙ୍କୁ ମୋ ଠାରୁ ପଦକ ଆଶା ଥିଲା । ମୁଁ ସାମାନ୍ୟ ବିଚଳିତ ହୋଇଯାଇଥିଲି ମାତ୍ର ନିଜର ସର୍ବଶ୍ରେଷ୍ଠ ପ୍ରଦର୍ଶନ ପାଇଁ ପଣ କରିଥିଲି । 2016ର ମୋର ପ୍ରଦର୍ଶନ ଭଲ ରହନଥିଲା କିନ୍ତୁ ପରାଜୟରୁ ଏକ ଉଚିତ ଶିକ୍ଷା ମିଳିଥିଲା ଓ କେଉଁଠି ସୁଧାର କରିବାକୁ ଜରୁରୀ ଥିଲା ମୋତେ ଜଣାଥିଲା । ଏଥିପାଇଁ ବାସ୍ତବରେ ମୁଁ କଠିନ ପରିଶ୍ରମ କରିଥିଲି ।"
2000 ସିଡନୀ ଅଲମ୍ପିକରେ କର୍ଣ୍ଣମ ମାଲେଶ୍ବରୀ 69 କିଲୋଗ୍ରାମ ବର୍ଗରେ କାଂସ୍ୟ ପଦକ ଜିତିଥିଲେ । ଏହାପରେ ଏହି ଖେଳରେ ମୀରାବାଇ ଦେଶକୁ ଦ୍ବିତୀୟ ପଦକ ଦେଇଛନ୍ତି ।
ଅଲମ୍ପିକରେ ରୌପ୍ୟ ପଦକ ସହିତ ମୀରାବାଇ, ରାଜ୍ୟଗୋଷ୍ଠୀ କ୍ରୀଡା, ଏସୀୟ ଚମ୍ପିଆନସିପ ଓ ବିଶ୍ବ ଚମ୍ପିଆନସିପରେ ମଧ୍ୟ ପଦକ ବିଜୟିନୀ ରହିଛନ୍ତି ।