ଶାରଜାହ:ଶେଷ ଓଭରରେ ଶ୍ରୀଲଙ୍କା ହାତରୁ ମ୍ୟାଚ୍ ଛଡାଇନେଲେ ଡେଭିଡ ମିଲର୍ । ସ୍ପିନର ୱାହିନ୍ଦୁ ହସରଙ୍ଗାଙ୍କ ହ୍ୟାଟ୍-ଟ୍ରିକ୍ ୱିକେଟ ହାସଲ ସତ୍ତ୍ବେ ଶ୍ରୀଲଙ୍କା ପରାସ୍ତ । ଡେଭିଡ ମିଲରଙ୍କ ଦମଦାର ପାୱର ହିଟିଂରେ ଶେଷ ଓଭରରେ ବାଜିମାରିବା ସହ ୪ ୱିକେଟରେ ବିଜୟୀ ହୋଇଛି ଦକ୍ଷିଣ ଆଫ୍ରିକା । ଶାରଜାହ କ୍ରିକେଟ ଗ୍ରାଉଣ୍ଡରେ ଖେଳାଯାଇଥିବା ଟି-୨୦ ବିଶ୍ବକପ ସୁପର ୧୨ର ଏହି ମ୍ୟାଚ୍ ଟୁର୍ଣ୍ଣାମେଣ୍ଟର ଅନ୍ୟତମ ରୋମାଞ୍ଚକର ମୁକାବିଲା ରହିଥିଲା ।
୧୪୩ ରନ୍କୁ ପିଛା କରୁଥିବା ଦକ୍ଷିଣ ଆଫ୍ରିକାକୁ ଇଂନିସର ଚତୁର୍ଥ ଓଭରରେ ଡବଲ ଝଟ୍କା ଦେଇଥିଲେ ଦୁଷ୍ମନ୍ତ ଚମୀରା । ଉଭୟ ଦକ୍ଷିଣ ଆଫ୍ରିକା ଓପନର ଶୀଘ୍ର ପାଭିଲିୟନ ଫେରିଥିଲେ । ପରେ ରସି ଭାନ ଡର୍ ଡସନଙ୍କୁ ଦାସୁନ ସନାକା ଅଷ୍ଟମ ଓଭରରେ ରନ୍ଆଉଟ୍ କରିବା ପରେ ସଙ୍କଟରେ ପଡିଥିଲା ଦକ୍ଷିଣ ଆଫ୍ରିକା । ୧୦ ଓଭର ସୁଦ୍ଧା ଦକ୍ଷିଣ ଆଫ୍ରିକାର ସ୍କୋର ୬୨/୩ ରହିଥିଲା । କ୍ୟାପଟେନ ତେମ୍ବା ବାଭୁମା ଓ ଆଡନ ମାର୍କ୍ରମ ଇଂନିସ ସମ୍ଭାଳିଥିଲେ ।
ମାତ୍ର ଶ୍ରୀଲଙ୍କାର ଷ୍ଟାର ସ୍ପିନର ହସରଙ୍ଗାଙ୍କ ହ୍ୟାଟ-ଟ୍ରିକ୍ର ଶିକାର ହୋଇଥିଲେ ମାର୍କ୍ରମ, ବାଭୁମା ଓ ପ୍ରିଟୋରିସ । ଏହାପରେ ଶ୍ରୀଲଙ୍କାର ସମ୍ଭାବ୍ୟ ବିଜୟକୁ ସାମ୍ନାରେ ଦେଖି ସିଂହଳ କ୍ୟାମ୍ପ ଉଲ୍ଲସିତ ହୋଇଥିଲା । ମାତ୍ର ଡେଭିଡ ମିଲର କିଛି ଅଲଗା ଅନ୍ଦାଜରେ ମ୍ୟାଚ୍ ଫିନିସ କରିବାକୁ ପହଞ୍ଚିଥିଲେ । ଷ୍ଟାର ଦକ୍ଷିଣ ଆଫ୍ରିକୀୟ ଅଳରାଉଣ୍ଡର ୧୩ ବଲ୍ରୁ ୨୩ ରନ୍ର ମ୍ୟାଚ୍ ବିଜୟୀ ଇଂନିସ ଖେଳିଥିଲେ । ରବାଡା ମଧ୍ୟ ୭ ବଲ୍ରୁ ୧୩ ରନ୍ର ଉପଯୋଗୀ ଯୋଗଦାନ କରିଥିଲେ । ଫଳରେ ଗୋଟିଏ ବଲ୍ ବାକିଥାଇ ବିଜୟ ଲକ୍ଷ୍ୟ ହାସଲ କରିନେଇଥିଲା ଦକ୍ଷିଣ ଆଫ୍ରିକା । ଶ୍ରୀଲଙ୍କା ପକ୍ଷରୁ ହସରଙ୍ଗା ୩ଟି ଓ ଦୁଷ୍ମନ୍ତ ଚମୀରା ୨ଟି ୱିକେଟ ହାସଲ କରିଥିଲେ ।