ଚେନ୍ନାଇ: ଆଖି ବୁଜିଲେ ଯୁବ ଟେବୁଲ ଟେନିସ୍ ଖେଳାଳି ବିଶ୍ବା ଦିନଦୟାଲନ୍ । ରବିବାର ଏକ ସଡକ ଦୁର୍ଘଟଣାରେ ତାଙ୍କର ମୃତ୍ୟୁ ହୋଇଛି । ସେ ୮୩ତମ ସିନିୟର ନ୍ୟାସନାଲ ଏବଂ ଇଣ୍ଟର-ଷ୍ଟେଟ ଟେବୁଲ ଟେନିସ ଚାମ୍ପିୟନସିପରେ ଭାଗ ନେବା ପାଇଁ ଗୁଆହାଟିରୁ ସିଲଂ ଅଭିମୁଖେ ଯାଉଥିବା ବେଳେ ଏହି ଦୁର୍ଘଟଣା ଘଟିଛି । ଏହି ଦୁର୍ଘଟଣାରେ ବିଶ୍ବାଙ୍କର ମୃତ୍ୟୁ ହୋଇଥିବାବେଳେ ଅନ୍ୟ ତିନିଜଣ ଗୁରୁତର ଆହତ ହୋଇଛନ୍ତି । ଡାକ୍ତରଙ୍କ କହିବାନୁସାରେ, ଏହି ତିନିଜଣଙ୍କ ଅବସ୍ଥା ସ୍ଥିର ଅଛି ଏବଂ ସେମାନେ ବିପଦ ମୁକ୍ତ ଅଛନ୍ତି ।
ମେଘାଳୟ ଟେବୁଲ ଟେନିସ ସଂଘ କହିଛି କି, ଡାକ୍ତରଖାନା ଯିବା ବାଟରେ ବିଶ୍ବାଙ୍କର ମୃତ୍ୟୁ ହୋଇଛି । ଅନ୍ୟ ଖେଳାଳିଙ୍କୁ ଉତ୍ତର ପୂର୍ବାଞ୍ଚଳ ଇନ୍ଦିରା ଗାନ୍ଧୀ ଆଞ୍ଚଳିକ ସ୍ବାସ୍ଥ୍ୟ ଏବଂ ମେଡିକାଲ ସାଇନ୍ସରେ ଭର୍ତ୍ତି କରାଯାଇଛି । MTTA ଉପାଧ୍ୟକ୍ଷ ବ୍ରୁସ୍ ପି ମାରାକ୍ ଏବଂ ସାଧାରଣ ସମ୍ପାଦକ ଚିରଞ୍ଜୀବ ଚୌଧୁରୀ ଜଣେ ଦକ୍ଷ ତଥା ପ୍ରତିଭାବାନ ଟେବୁଲ୍ ଟେନିସ୍ ଖେଳାଳିଙ୍କୁ ହରାଇ ଶୋକ ବ୍ୟକ୍ତ କରିଛନ୍ତି ।