ଭୁବନେଶ୍ବର: ଅନ୍ତର୍ଜାତୀୟ ଧାବିକା ଦୂତି ଚାନ୍ଦକୁ ବଦନାମ କରିବା ଘଟଣାରେ ପୋଲିସ ରିମାଣ୍ଡରେ ୱେବ ପୋର୍ଟାଲ ଏଡିଟର ଓ ରିପୋର୍ଟର । ସାମ୍ବାଦିକ ସମ୍ମିଳନୀ କରି ଧାବିକା ଦୂତି ଚାନ୍ଦ, ୱେବପୋର୍ଟାଲ ବିରୁଦ୍ଧରେ ଆଣିଥିଲେ ସଙ୍ଗୀନ ଅଭିଯୋଗ । ଏପରିକି ଥାନାର ମଧ୍ୟ ଦ୍ବାରସ୍ଥ ହୋଇଥିଲେ । ଉଦ୍ଦେଶ୍ୟ ମୂଳକ ଖବର ପ୍ରସାରଣ କରି ଦୂତିଙ୍କ ସମ୍ମାନ ହାନୀ ସହ ବ୍ଲାକମେଲ କରିଥିବା ଅଭିଯୋଗ କରିଥିଲେ ଦୂତି।
ଦିନିକିଆ ରିମାଣ୍ଡରେ ୱେବପୋର୍ଟାଲ ଏଡିଟର ଓ ରିପୋର୍ଟର
ପରେ ଦୂତିଙ୍କ ଅଭିଯୋଗ ଆଧାରରେ ମାତ୍ର କିଛି ଘଣ୍ଟା ମଧ୍ୟରେ ଆକ୍ସନ ନେଇଥିଲା କମିଶନରେଟ୍ ପୋଲିସ୍ । ସଂପୃକ୍ତ ୱେବପୋର୍ଟାଲର ସମ୍ପାଦକ(Editor) ସୁଧାଂଶୁ ରାଉତ ଓ ରିପୋର୍ଟର ସ୍ମୃତି ରଂଜନ ବେହେରାଙ୍କୁ କମିଶନରେଟ୍ ପୋଲିସ ଗିରଫ କରି ସଙ୍ଗୀନ ଦଫାରେ କୋର୍ଟ ଚାଲାଣ କରିଥିଲା । ଆଜି ଉଭୟଙ୍କୁ ଝାରପଡ଼ା ଜେଲରୁ ଦିନିକିଆ ରିମାଣ୍ଡରେ ନେଇଛି ମହିଳା ଥାନା ପୋଲିସ । ସଦ୍ୟ ସମାପ୍ତ ଟୋକିଓ ଅଲମ୍ପିକରେ ଦୂତିଙ୍କ ପ୍ରଦର୍ଶନ ଭଲ ରହିନଥିଲା । ଏହାପରେ ସୋସିଆଲ ମିଡିଆରେ ସମାଲୋଚନାର ଶିକାର ହୋଇଥିଲେ ଦୂତି ।