ହାଇଦ୍ରାବାଦ: ସିଦ୍ଧୁଙ୍କୁ ନେଇ ପାକିସ୍ତାନ ସାଂସଦଙ୍କ ବୟାନ । କହିଲେ ପାକିସ୍ତାନର ପରମ ବନ୍ଧୁ ସିଦ୍ଧୁ । ଏହା ପରେ ପୁଣି ଜୋର ଧରିଲା ଚର୍ଚ୍ଚା ।
ଶନିବାର ପାକିସ୍ତାନ ପ୍ରଧମାନମନ୍ତ୍ରୀ ଇମ୍ରାନ୍ ଖାନ୍ଙ୍କ ନିମନ୍ତ୍ରଣ କ୍ରମେ କରତାରପୁର କରିଡର ଉଦଘାଟନ ଉତ୍ସବରେ ଯୋଗ ଦେଇଥିଲେ କ୍ରିକେଟରୁ ରାଜନେତା ପାଲଟିଥିବା ନବଜୋତ ସିଂହ ସିଦ୍ଧୁ ।
ସେହିପରି କରତାରପୁର କରିଡର ଦେଇ ଶନିବାର ପ୍ରଥମ ବ୍ୟାଚ୍ରେ ଭାରତୀୟ ଶ୍ରଦ୍ଧାଳୁମାନେ ପାକିସ୍ତାନରେ ପହଞ୍ଚିଛନ୍ତି । ଏହି କରିଡରକୁ ଭାରତୀୟ ସୀମାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଉଦ୍ଘାଟନ କରିଥିବା ବେଳେ ପାକିସ୍ତାନ ପଟେ ଇମ୍ରାନ୍ ଖାନ୍ ଏହାକୁ ଶୁଭାରମ୍ଭ କରିଥିଲେ ।
ତେବେ ଏହି କାର୍ଯ୍ୟକ୍ରମରେ ଯୋଗଦେଇ ସିଦ୍ଧୁ ପାକ୍ ପ୍ରଧାନମନ୍ତ୍ରୀ ଇମ୍ରାନ ଖାନ୍ଙ୍କୁ ଦିଲଦାର ବୋଲି କହି ପ୍ରଶଂସା କରିଛନ୍ତି । ମାତ୍ର ପାକିସ୍ତାନର ସାଂସଦ ଫୈଜଲ ଜାଭେଦ ଖାନ୍ କିନ୍ତୁ ସିଦ୍ଧୁଙ୍କୁ ନେଇ ଏମିତି କିଛି ବୟାନ ଦେଇଛନ୍ତି । ସେ କହିଛନ୍ତି, " ସିଦ୍ଧୁ ତାଙ୍କ ଟେଷ୍ଟ କ୍ୟାରିୟରରେ 9 ଟି ଟେଷ୍ଟ ଶତକ ମାରିଛନ୍ତି । ହେଲେ ପାକିସ୍ତାନ ବିପକ୍ଷରେ ଗୋଟିଏ ଶତକ ମାରି ନାହାଁନ୍ତି । ଏହା ପାକିସ୍ତାନ ପ୍ରତି ସିଦ୍ଧୁଙ୍କ ଭଲ ପାଇବାକୁ ଦର୍ଶାଉଛି ।"
ଏହାପୂର୍ବରୁ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ୍ ଖାନ୍ଙ୍କ ଶପଥ ପାଠ ଉତ୍ସବରେ ମଧ୍ୟ ସିଦ୍ଧୁ ଯୋଗ ଦେଇଥିଲେ ।