ଭାନ୍ତା(ଫିନଲାଣ୍ଡ):ଚଳିତ ସୁଦୀରମାନ କପ୍ ବ୍ୟାଡମିଣ୍ଟନ ଟୁର୍ଣ୍ଣାମେଣ୍ଟରୁ ବିଦାୟ ନେଇଛି ଭାରତ । ପୂର୍ବରୁ କ୍ବାର୍ଟର-ଫାଇନାଲ ଦୌଡରୁ ବାଦ୍ ପଡିସାରିଥିବା ବ୍ୟାଡମିଣ୍ଟନ ଟିମ ଇଣ୍ଡିଆ ଶେଷ ଗ୍ରୁପ ପର୍ଯାୟରେ ସାନ୍ତ୍ବନାମୂଳକ ବିଜୟ ହାସଲ କରିଛି । ଆୟୋଜକ ଫିନଲାଣ୍ଡ୍କୁ ୪-୧ରେ ହରାଇଛି ଭାରତ । ଭାରତୀୟ ଟିମର ଏହି ବିଜୟରେ ଓଡିଆ ଝିଅ ଋତୁପର୍ଣ୍ଣା ପଣ୍ଡାଙ୍କ ପ୍ରମୁଖ ଯୋଗଦାନ ରହିଛି । ମହିଳା ଡବଲ୍ସ ଇଭେଣ୍ଟରେ ତନିସା କ୍ରାଷ୍ଟୋ ଓ ଋତୁପର୍ଣ୍ଣା, ଫିନଲାଣ୍ଡ ଯୋଡି ମାଥିଲା ଲିନ୍ଧୋଲମ ଓ ଜେନ୍ନି ନେଷ୍ଟ୍ରମଙ୍କୁ ୨୧-୧୨ ଓ ୨୧-୧୩ ସେଟ୍ରେ ହରାଇଛନ୍ତି ।
ମିକ୍ସଡ ଡବଲ୍ସ ଯୋଡି ଏମଆର ଅର୍ଜୁନ ଓ ଅଶ୍ବିନ ପୋନ୍ନାପା, ଆଣ୍ଟୋନ କୈଷ୍ଟି ଓ ଜେନ୍ନି ନେଷ୍ଟ୍ରେମଙ୍କୁ ୨୧-୯, ୨୧-୧୪ରେ ହରାଇଛନ୍ତି । କିଦାମ୍ବ ଶ୍ରୀକାନ୍ତ ଓ ମାଳବିକା ବଂଶଦ ମଧ୍ୟ ନିଜର ପୁରୁଷ ଓ ମହିଳା ସିଙ୍ଗଲ୍ସ ପ୍ରତିଦ୍ବନ୍ଦ୍ବୀଙ୍କୁ ପରାସ୍ତ କରିଛନ୍ତି । ଶ୍ରୀକାନ୍ତ କାଲେ କୋଲଜେନେନଙ୍କ ୧୬-୨୧, ୨୧-୧୪, ୨୧-୧୧ରେ ହରାଇଥିବାବେଳେ ମାଳବିକା ନେଲା ନିକବିଷ୍ଟଙ୍କ ବିପକ୍ଷରେ ୨୧-୧୬ ଓ ୨୧-୧୧ରେ ବିଜୟୀ ହୋଇଛନ୍ତି ।