ଭୁବନେଶ୍ବର: ଫାଇନାଲ ଟିକଟ ହାତେଇଲା ଜର୍ମାନୀ । ଏହି ରୋମାଞ୍ଚକର ମ୍ୟାଚରେ ଅଷ୍ଟ୍ରେଲିଆକୁ ୪-୩ ଗୋଲରେ ମାତ୍ ଦେଇ ଫାଇନାଲରେ ପ୍ରବେଶ କରିଛି ଜର୍ମାନୀ । ଆଜି (ଶୁକ୍ରବାର ) କଳିଙ୍ଗ ଷ୍ଟାଡିୟମରେ ପ୍ରଥମ ସେମିଫାଇନାଲ ମ୍ୟାଚ ଖେଳାଯାଇଛି । ପ୍ରଥମ ସେମିଫାଇନାଲରେ ମୁହାଁମୁହିଁ ହୋଇଥିଲେ ଅଷ୍ଟ୍ରେଲିଆ ବନାମ ଜର୍ମାନୀ । ଏହି ମୁକାବିଲାରେ ଅଷ୍ଟ୍ରେଲିଆକୁ ମାତ୍ ଦେଇଛି ଜର୍ମାନୀ । ଜର୍ମାନୀ ୪-୩ ଗୋଲରେ ଅଷ୍ଟ୍ରେଲିଆକୁ ପରାସ୍ତ କରିଛି । ଏହି ବିଜୟ ପରେ ଜର୍ମାନୀ ପ୍ରଥମ ଦଳ ଭାବରେ ହକି ବିଶ୍ବକପ ୨୦୨୩ରେ ଫାଇନାଲରେ ପ୍ରବେଶ କରିଛି । ଆଜିର ମ୍ୟାଚରେ ଜର୍ମାନୀର ନିକୋଲସ ୱାଲେନ ପ୍ଲେୟର ଅଫ ଦି ମ୍ୟାଚ ବିବେଚିତ ହୋଇଛନ୍ତି ।
କଳିଙ୍ଗ ଷ୍ଟାଡିୟମରେ ପ୍ରଥମ ସେମିଫାଇନାଲରେ ମୁକାବିଲାରେ ଦେଖିବାକୁ ମିଳିଥିଲା ହାଇଭୋଲଟେଜ ମୁକାବିଲା । ଅଷ୍ଟ୍ରେଲିଆ ବନାମ ଜର୍ମାନୀ ମଧ୍ୟରେ ହୋଇଥିଲା କଡା ଟକ୍କର । ତିନି ଥର ବିଶ୍ବଚମ୍ପିଆନ ଅଷ୍ଟ୍ରେଲିଆ ଆରମ୍ଭରୁ ଆଟାକିଂ ମୋଡରେ ଖେଳିଥିଲା । ପ୍ରଥମାର୍ଦ୍ଧରେ ଜର୍ମାନୀ ଉପରେ ଭାରି ରହିଥିଲା ଅଷ୍ଟ୍ରେଲିଆ । କଙ୍ଗାରୁ ଦଳ ପ୍ରଥମାର୍ଦ୍ଧରେ ଦୁଇଟି ଗୋଲ ଦେଇଥିବା ବେଳେ ଜର୍ମାନୀ ଗୋଟିଏ ବି ଗୋଲ ଦେଇନଥିଲା । ଅଷ୍ଟ୍ରେଲିଆ ମ୍ୟାଚର ୧୨ ମିନିଟରେ ଗୋଲ ଦେଇ ଖାତା ଖୋଲିଥିଲା । ଏହି ଗୋଲ ଜେର୍ମି ହାୟୱାର୍ଡ ଦେଇଥିଲେ । ଏହା ପରେ ମ୍ୟାଚ ୨୭ ମିନିଟରେ ଅଷ୍ଟ୍ରେଲିଆର ନାଥନ ଏଫାରମସ ଗୋଲ ଦେଇ ଗୋଲ ସ୍କୋରକୁ ୨-୦ କରିଥିଲେ ।