ଭାଲେନସିଆ (ସ୍ପେନ):ମହିଳା ହକି ନେସନ୍ସ କପରେ ଭାରତର ଦମଦାର ପ୍ରଦର୍ଶନ ଦେଖିବାକୁ ମିଳିଛି ( Hockey Nations Cup) । ଗୋଟିଏ ପରେ ଗୋଟିଏ ମ୍ୟାଚ ଜିତି ବିଜୟ ଧାରା ବଜାୟ ରଖିଛି ଭାରତୀୟ ଦଳ । ବୁଧବାର ଦକ୍ଷିଣ ଆଫ୍ରିକା ବିପକ୍ଷରେ ଖେଳାଯାଇଥିବା ମ୍ୟାଚରେ ବିଜୟ ସହ ହ୍ୟାଟ୍ରିକ ସଫଳତା ହାସଲ କରିଛି ଦଳ । ତୃତୀୟ ପୁଲ ମ୍ୟାଚରେ ଦକ୍ଷିଣ ଆଫ୍ରିକାକୁ 2-0ରେ ପରାସ୍ତ କରି ସେମିଫାଇନାଲରେ ପ୍ରବେଶ କରିଛି ଭାରତୀୟ ମହିଳା ହକି ଦଳ । ସେମିମୁକାବିଲାରେ ଆୟର୍ଲାଣ୍ଡକୁ ଭେଟିବ ଭାରତ ।
ଆରମ୍ଭରୁ ମ୍ୟାଚରେ କଡା ଟକ୍କର ହୋଇଥିଲା । ଖାତା ଖୋଲିବାକୁ ଦୁଇଦଳ ଜୋରଦାର ପ୍ରୟାସ କରିଥିଲେ । 14 ମିନିଟରେ ଭାରତ ପକ୍ଷରୁ ଓଡିଶାର ଦୀପଗ୍ରେସ ଏକ୍କା ଗୋଲ କରି ଖାତା ଖୋଲିଥିଲେ । ପ୍ରଥମାର୍ଦ୍ଧ ସୁଦ୍ଧା 1-0ରେ ଆଗୁଆ ଥିଲା ଭାରତ । ଗୋଲ ପରିଶୋଧ କରିବାକୁ ଦକ୍ଷିଣ ଆଫ୍ରିକା ଜୋରଦାର ପ୍ରୟାସ କରିଥିଲା । ଚତୁର୍ଥ କ୍ବାର୍ଟର ମ୍ୟାଚ ଶେଷ ହେବାକୁ ଗୋଟିଏ ମିନିଟ ବାକି ଥିବାବେଳେ 59ତମ ମିନିଟରେ ଗୁରଜିତ କୌର ଆଉ ଏକ ଗୋଲ କରି ଦଳର ବିଜୟ ବ୍ୟବଧାନକୁ 2-0ରେ ପହଞ୍ଚାଇଥିଲେ । ହ୍ୟାଟ୍ରିକ ବିଜୟ ସହ ଅପରାଜେୟ ରହି ସେମିରେ ପ୍ରବେଶ କରିଛି ଭାରତ ।