ଭୁବନେଶ୍ବର: ଆଜି ଓଡିଶା ଏଫସି ତା'ର ଘରୋଇ ଗ୍ରାଉଣ୍ଡ କଳିଙ୍ଗ ଷ୍ଟାଡିୟମରେ ଏଫସି ଗୋଆକୁ ଭେଟିବ । ତେବେ ଓଡିଶା ତା'ର ଘରୋଇ ଗ୍ରାଉଣ୍ଡରେ ପୂର୍ବରୁ ଖେଳିଥିବା ସମସ୍ତ ତିନୋଟି ମ୍ୟାଚରେ ଜିତିଛି । ଟିମ୍ ଓଡିଶାର ଲକ୍ଷ୍ୟ ରହିବ ସେହି ରେକର୍ଡ ଜାରି ରହୁ । ଏଥିସହ ଗୋଆ ବିପକ୍ଷରେ ବିଜୟ ହାସଲ କରି ଟପ୍ -4ରେ ନିଜ ସ୍ଥିତି ମଜବୁତ କରିବାକୁ ଚାହିଁବ ଘରୋଇ ଟିମ୍ ।
ମୁଖ୍ୟ କୋଚ ଜୋସେଫ ଗୋମ୍ବାଉ କହିଛନ୍ତି ଯେ, ଗୋଆ ଏକ ଟପ୍ ଟିମ୍ । ଆମମାନଙ୍କୁ ଜଣା ଅଛି ସେମାନେ କିପରି ଖେଳନ୍ତି । ଆମେ ସବୁ ମ୍ୟାଚ ନିଜ ଶୈଳୀରେ ଖେଳୁଛୁ । କିନ୍ତୁ ବିପକ୍ଷ ଟିମକୁ ଦେଖି ଆମ ଗେମ୍ରେ କିଛିଟା ପରିବର୍ତ୍ତନ କରିଛୁ । ଆମେ ଏହି ସପ୍ତାହରେ ଭଲ ଅଭ୍ୟାସ କରିଛୁ । ଆମ ଟିମ୍ ଏହି ମ୍ୟାଚ ପାଇଁ ପ୍ରସ୍ତୁତ ।
ସୂଚନାଥାଉକି, ଓଡିଶା ଏଫ୍ସିର ଷ୍ଟାର ଖେଳାଳି ଅରିଡେନ ସାନଟାନା ଆହତ ହୋଇଛନ୍ତି । ଫଳରେ ସେ ଚଳିତ ସିଜନରେ ଆଉ ଦଳ ପକ୍ଷରୁ ଖେଳି ପାରିବେ ନାହିଁ । ତାଙ୍କ ସ୍ଥାନରେ ଷ୍ଟ୍ରାଇକର ମାନୁଏଲ ଓନୟୁ ଖେଳିବେ । ସେହିପରି ଯୁବ ଖେଳାଳି ଶୁଭମ ଷଡଙ୍ଗୀ ଓ କାର୍ଲୋସ ଡେଲଗୋଡା ଖେଳରୁ ବାସନ୍ଦ ଅଛନ୍ତି ।